ՀՀԿ-ական գյուղապետը վատնում է պետբյուջեն. ահազանգ Էջմիածնի հերթական գյուղից (լուսանկարներ)
Հայաստանում տեղի ունեցած վերջին իրադարձություններից հետո ուժային կառույցները գործի են անցել և մեկը մյուսի հետևից չարաշահումների ու յուրացումների դեպքերի աղմկահարույց բացահայտումներ են իրականացվում: Հատկապես Մանվել Գիրիգորյանի ձերբակալությունից հետո լրատվամիջոցների խոշորացույցի ներքո է գտնվում Էջմիածին քաղաքն ու նրա հարակից գյուղերը, որոնք, ինչպես արդեն գիտենք, գտնվում էին Մանվել Գրիգորյանի և նրա շրջապատի անմիջական վերահսկողության ներքո:
Operativ.am-ի խմբագրություն դիմած մի խումբ քաղաքացիներ ահազանգում էին պետբյուջեի վատնման հերթական դեպքի մասին: Ահազանգի հետքերով Operativ.am-ի թղթակիցը եղել է Էջմիածնի տարածաշրջանի Հայթաղ համայնքում՝ տեղում ծանոթանալու իրավիճակին և բողոքներին:
Ըստ մարզպետարանի տարեկան ներկայացված հաշվետվության գյուղի բյուջեն կազմում է 64 մլն դրամ:
Մեզ հետ զրույցում համայնքի բնակիչները նշում էին, որ դժգոհությունը միշտ էլ եղել է 2002թ-ից ղեկավարող գյուղապետի դեմ, սակայն մինչ վերջին իրադարձությունները վստահ էին, որ ոչինչ չեն կարող անել ՀՀԿ-ական գյուղապետի անօրինությունների դեմ: Նրանց խոսքերով համայնքապետը պարբերարբար է որպես սոցիալական աջակցություն միջոցներ դուրս գրում բյուջեից, սակայն այդ միջոցները կամ մասնակի են հասնում գյուղացիներին, կամ ընդհանրապես չեն հասնում:
2008թ-ին վաճառվել է համայնքի սեփականություն հանդիսացող հողերից, ընդհանուր առմամբ 90 մլն դրամի: Այդ գումարների մի մասը ձևակերպված է որպես մանկապարտեզի վերանորոգման համար ծախսեր, իսկ մնացած գումարի «ճակատագիրն» անհայտ է: Իսկ վերանորոգման ընթացքում մանկապարտեզի պատուհանները փոքրացվել են, ինչի պատճառով լուսավորությունը պակասել է:
Բնակիչների խոսաքերով 2013 թ-ի կարկտահարությունից հետո համայնքնին հատկացել է գումար, որից տուժած գյուղացիներին ոչինչ չի հատկացվել: Մենք փորձեցինք գտնել հատկացումների մասին որևէ ցուցակ, թե այդ գումարներից ով որքան է ստացել. պարզվում է՝ այդպիսի ցուցակ չկա:
Նշենք նաև, որ որպես կանոն համայնքների ավագանիների կողմից կայացված որոշումները փակցվում են համայնքապետարանի ցուցատախտակի վրա՝ հասանելի բոլորի համար: Մեր այցի ժամանակ նման որևէ ցուցատախտակ չկար:
Գյուղացիների խոսքերով պաշտոնավարման 16 տարիների ընթացքում գյուղում ոչինչ չի արվել և մոտ օրերս իրենք ևս հետևելու են Արշալույս գյուղի օրինակին և բողոքի ակցիա են իրականացնելու: Մեր այն հարցին, թե ո՞րն է լինելու նրանց պահանջը, նշեցին՝ համայնքապետի հրաժարականը: Իսկ ցանկալի համայնքապետի հարցում նրանք դեռ չէին կողմնորոշվել, սակայն նշեցին, որ նախորդ ընտրություններում ցանկալի թեկնածուներ ունեցել են, սակայն հստակ անուններ տալուց խուսափեցին: