ԱԺ նիստին նրա ներկա լինելու հանգամանքը սահմանադրական է. Աշոտյանի պատասխանը՝ Փաշինյանին
ՀՀ ԱԺ պատգամավոր, Արտաքին հարցերի մշտական հանձնաժողովի ղեկավար Արմեն Աշոտյանը ֆեյսբուքյան իր էջում անդրադարձել է խորհրդարանի նախորդ նիստին վարչապետ Նիկոլ Փաշինյանի բացակայությանը:
Նա անդրադարձել է Նիկոլ Փաշինյանի արձագանքին և նշել է, որ ԱԺ նիստին վարչապետի ներկա լինելու հանգամանքը սահմանադրական է:
«Հարգելի գործընկերներ,
Ձեր ուշադրությանն եմ ներկայացնում Ազգային Ժողովում Կառավարության հետ հարց ու պատասխանի իրավական երկու հիմք՝ ՀՀ Սահմանադրության հոդված 112 և ՀՀ Ազգային Ժողովի կանոնակարգ֊օրենքի հոդված 40։
Ի դեպ, վերջին օրենքը, որը ուղղակիորեն սահմանում է ԱԺ այդ նիստին ՀՀ վարչապետի ներկա լինելու հանգամանքը, ՍԱՀՄԱՆԱԴՐԱԿԱՆ է։
Բարի վերադարձ եմ մաղթում վարչապետին։
Հ.Գ. Իրականում հասկանալի է, որ վարչապետի պաշտոնում թե նախկինում, թե հիմա բազմաթիվ այլ հրատապ գործեր են լինում։ Մոսկվայի հանդիպումները շատ կարևոր եմ համարել, միաժամանակ դիմել եմ կառավարության աշխատակազմին վարչապետի աշխատանքային ժամանակացույցը կազմել ըստ սահմանադրության պարտավորությունների»,-գրել է Աշոտյանը։
Երեկ վարչապետ Նիկոլ Փաշինյանը ֆեյսբուքյան ուղիղ եթերում ի թիվս այլ հարցերի անդրադարձել էր խորհրդարանում Արմեն Աշոտյանի հնչեցրած դիտարկմանը, թե նախկինում Փաշինյանը քննադատում էր վարչապետին՝ ԱԺ նիստին ներկա չլինելու համար, սակայն այժմ ինքը նիստին ներկա չի լինում:
«Ես Մոսկվա եկա չորեքշաբթի, և այդ օրը ԱԺ-կառավարություն հարցուպատասխանն էր, և տեղյակ եմ, որ «Հանրապետական» խմբակցության ներկայացուցիչները խոսել են այն մասին, թե ես նախկինում քննադատել եմ վարչապետներին, ովքեր ներկա չէին լինում ԱԺ-ում, իսկ ես, ահա, նույն կերպ եմ վարվում, ես ուզում եմ ընդգծել մի շատ կարևոր տարբերություն. ուրեմն՝ նախորդ Սահմանադրության մեջ շատ հստակ ընդգծվում էր, որ վարչապետն ու Կառավարության անդամները չորեքշաբթի օրվա նիստում պատասխանում են պատգամավորների հարցերին, նոր Սահմանադրության մեջ, որը ՀՀԿ-ի Սահմանադրությունն է, վարչապետի հանգամանքը հատուկ չի ընդգծվում, ինչը դե յուրե հնարավորություն է ստեղծում, որպեսզի վարչապետը, երբեմն, բացակայի ԱԺ-Կառավարություն հարցուպատասխաններից»,-ասե; է Փաշինյանը: