Հայաստանում տնտեսական, քաղաքական, անձնական հետապնդումների էջը անվերադարձ փակված է. Նիկոլ Փաշինյան (լուսանկարներ)

Վարչապետ Նիկոլ Փաշիյանն այսօր ՀՀ տնտեսական զարգացման և ներդրումների նախարարության ղեկավար աշխատակազմին է ներկայացրել նորանշանակ նախարար Արծվիկ Մինասյանին և կատարած աշխատանքի համար շնորհակալություն հայտնել նախկին նախարար Սուրեն Կարայանին։

Խոսելով երկրի տնտեսության ոլորտում առաջիկա անելիքների մասին, վարչապետը նշել է, որ առաջիկա կարևորագույն խնդիրներից մեկը, որ անհրաժեշտ է լուծել, կապված է ներդրումային միջավայրի հետ։

«Հույս ունեմ, որ մենք արդեն զուտ մթնոլորտի առումով, քաղաքական որոշակի կանոնների հանրահռչակման առումով բավականին խնդիրներ լուծել ենք եւ ուզում եմ կրկնել, որ Հայաստանում մենաշնորհներ չեն լինելու։ Ես վստահ չեմ, որ այս պահին դեռեւս չկան մենաշնորհներ, առնվազն դեֆակտո նրանք գոյություն ունեն, եւ մենք հետեւողականորեն պետք է աշխատենք, որպեսզի դրանք դադարեն գոյություն ունենալ։ Ուզում եմ մի նրբություն ընդգծել․ես չափազանց մեծ գոհունակությամբ եմ արձանագրում, որ տնտեսական դաշտը ադեկվատ է արձագանքում մեր քաղաքական հայտարարություններին»,- նշել է վարչապետը, ավելացնելով, որ մայիսի 8-ից հետո մեր տնտեսությունը ոչ միայն նեգատիվ ազդակներ չի ցուցաբերել, այլեւ ցուցաբերում է որոշակի պոզիտիվ ազդակներ, ինչը կապված է այն լավատեսական մթնոլորտի եւ սպասումների հետ, որ գոյություն ունեն։

Վարչապետ Փաշինյանը շնորհակալություն է հայտնել Սուրեն Կարայանին, ով իր հերթին, երախտիքի խոսք է ասել նախարարության անձնակազմին բարձր պրոֆեսիոնալիզմի համար եւ մաղթել է Արծվիկ Մինասյանին հաջողությամբ իրականացնել բոլոր նախանշված ծրագրերը, նաեւ հայտնել է իր պատրաստակությունը՝ աջակցելու հետագա աշխատանքներում։

Անդրադառնալով Արծվիկ Մինասյանի նշանակմանը, վարչապետ Նիկոլ Փաշինյանը նշել է, որ ուրախ է կառավարությունում համատեղ աշխատանքի հնարավորության համար․«Մենք դեռ խորհրդարանից լավ գիտենք իրար, աշխատել ենք եւ, կարծում եմ, արդյունավետ համագործակցության որոշակի փորձ ունենք արդեն։ Համոզված եմ, որ ձեր գործունեությունը կլինի արդյունավետ այս կարգավիճակում, որը ձեզ համար նոր չէ»,- ասել է վարչապետ Փաշինյանը։

Արծվիկ Մինասյանը շնորհակալություն է հայտնել վարչապետին այն վստահության համար, որ ցուցաբերվել է ՀՅԴ-ի հետ համագործակցության արդյունքում, շնորհակալական խոսք ուղղել Սուրեն Կարայանին ՝իրականացրած աշխատանքի համար։ Անդրադառնալով վարչապետի խոսքին՝ Մինասյանը ասել է, որ նշված խնդիրները, մասնավորապես հակամենաշնորհային քաղաքականությունը, լինելու են նախարարության ամենօրյա աշխատանքի հիմքում։

«Մեզ սպասում է լավ առումով թեժ շրջան՝ ամենօրյա դրական փոփոխություններ բերելու տեսանկյունից, եւ մենք առաջիկայում կներկայացնենք տնտեսական ծրագիրը, որտեղ հեղափոխական մոտեցումներ կլինեն», - նշել է նախարար Մինասյանը, այդ առումով վարչապետից ակնկալելով ամբողջական աջակցություն։

Նիկոլ Փաշինյանը եւս մեկ անգամ ընդգծել է, որ Հայաստանում տնտեսական, քաղաքական, անձնական հետապնդումների էջը անվերադարձ փակված է, բայց մյուս կողմից կա սահման, որը օրինականության ապահովումն է․ «Կարծում եմ, այն խնդիրը, որ մենք ձեւակերպել ենք՝ Հայաստան Հանրապետության քաղաքացիների լավագույն ներուժը եւ, ընդհանրապես, ողջ ներուժը համախմբել Հայաստանի Հանրապետության շուրջ, Հայաստանի պետականության շուրջ, եւ ամեն օր պետք է գործենք այն զգացողությամբ, որ ծառայում ենք Հայաստանի Հանրապետությանը, ծառայում ենք Հայաստանի քաղաքացիներին եւ ծառայում ենք հայ ժողովրդին», - նշել է վարչապետը։