Հայաստանը ՎԶՄԲ-ից 2 մլն դոլարի լրացուցիչ վարկ է վերցնում. Օրինագիծը քննարկվում է ԱԺ-ում

Հայաստանը դիմել է Վերակառուցման և զարգացման միջազգային բանկին 2 մլն դոլար լրացուցիչ ֆինանսավորման առաջարկով: Այս ամսին, այսօր՝ ապրիլի 11-ին, ԱԺ-ում «Հայաստանի Հանրապետության և Վերակառուցման և զարգացման միջազգային բանկի միջև «Ոռոգման համակարգերի բարելավման ծրագրի համար լրացուցիչ ֆինանսավորում» վարկային համաձայնագիրը վավերացնելու մասին նախագիծը ներկայացնելիս նշեց Ջրային տնտեսության կոմիտեի նախագահ Արսեն Հարությունյանը:

Նրա խոսքով, ներկայացված համաձայնագիրը դեռևս 2013-ի հունիսին վավերացված համաձայնագրի վարկային փոխառության տրամաբանական լրացումն է: «Վարկային ծրագրով նախատեսված էր 30 մլն դոլարի վարկ ևս 7,5 մլն դոլարի համաֆինանսավորում, որով նախատեսված էր հիմնականում Մեղրիի, Քաղցրաշենի, Գեղարդալիճի և Բաղրամյան-Նորակերտ տարածքներում մեխանիկական ոռոգման համակարգերի փոխարինումը ինքնահոս համակարգերի: Ծրագրով պլանավորված աշխատանքներն իրականացվում են: Մենք ունենք տնտեսված գումարներ՝ 575 մլն դրամ, որոնք ուղղվել են Մեղրիի տարածաշրջանում մեկ այլ բնակավայրում անքնահոս համակարգի անցում»,-ասաց Արսեն Հարությունյանը:

Նա տեղեկացրեց, որ նոր վարկային միջոցները չեն ուղղվելու առաջին ծրագրի ավարտմանը, սա լրիվ նոր ծրագիր է. «Պարզապես Բաղրամյան-Նորակերտ հատվածում կառուցվող ջրագծի վերականգնման արդյունքում պարզ դարձավ, որ մենք ունենք մոտ 575 հա ոռոգելի հողատարածքներ, որից ոռոգվում է ընդամենը 45 հա-ն: Պատճառը քայքայված համակարգն է: Այդ տարածքում կառուցում ենք փակ համակարգ, տեղադրվում են ֆիլտրներ յուրաքանչյուր հողօգտագործողի մոտ, տեղադրվում են արեւային պանելներ ու հաշվիչներ եւ հնարավորություն է տրվում հողօգտագործողներին եւ ջրօգտագործող ընկերությանը օնլայն ռեժիմով հետեւել հատկացվող ջրի ռեժիմին ու քանակներին»:

Ըստ նրա, ծրագիրը հնարավորություն է տալիս առաջիկա 4 տարիներին այդ ողջ տարածքը ոռոգելի դարձնել, ջրով ապահովել, բերքատվությունը բարձրացնել 11-14 տոկոսով եւ տնտեսել տարեկան 5 մլն խմ ջուր:

«Այդ նպատակով Հայաստանը դիմել է Վերակառուցման եւ զարգացման միջազգային բանկին 2 մլն դոլար լրացուցիչ ֆինանսավորման առաջարկով»,-ասաց նա՝ հավելելով, որ այդ 2 մլն դոլարով կառուցվելու է 150 կմ ջրագիծ: