Դպրոցներում օտար լեզուների առումով լուրջ խնդիրներ կան. Նախարարը ներկայացրեց առկա վիճակը
Հայաստանի դպրոցներում օտար լեզուների զարգացման ծրագրի հետ կապված լուրջ խնդիրներ կան: Այս մասին, այսօր՝ փետրվարի 19-ին, լրագրողների հետ հանդիպման ժամանակ նշել է Հայաստանի ԿԳ նախարար Լևոն Մկրտչյանը:
Նրա խոսքով, օտար լեզուների ռումով կա երկու տիպաբանական ուղղություն՝ ընդհանուր լեզվաբանական կրթության տարածում և խորացված կրթություն:. «Ամենահաջող պիլոտը եղավ ֆրանսերենով. Այժմ 10 դպրոցում խորացված ուսուցում է իրականացվում: Բացի այդ, Բրիտանական խորհրդի աջակցությամբ դպրոցներում բացվում են անգլերենի ակումբներ, որոնք դառնում են մեր լաբորատորիաները: Այդպիսի դպրոցներից 5-ը մարզերում են, մեկը՝ Երևանում: Դրանցից 4-ում ներդրվել են այդ լաբորատորիաները: Ծրագիրը շարունակական է: Ունենք պայմանավորվածություն, որ յուրաքանչյուր մարզում նման 2 դպրոցներ լինեն:
Փորձը ցույց է տալիս, որ երբ բոլորին բերում ես Երևան, չի ստացվում»,-ընդգծեց նախարարը:
Լևոն Մկրտչյանի խոսքով, գերմաներենով նույնպես բավականին խորացված ծրագիր ունենք, մասնավորապես Գերմանիայից ուսուցիչներ են աշխատում Հայաստանում:
Ինչ վերաբերում է ռուսաց լեզվին, այժմ կա ռուսերենի ուսուցիչների վերապատրաստման խնդիր, մասնավորապես, մոտ 1500 ուսուցիչ վերապատրաստման կարիք ունի:
Լևոն Մկրտչյանը նկատեց, որ ընդհանուր առմամբ դպրոցներում երրորդ օտար լեզու մտցնելու գործընթացը սկզբուն շատ հեշտ է մտնում, բայց հետո խնդիրներ են ծագում որակի հետ կապված, հատկապես մարզերում: