Պոլսո Հայոց պատրիարքի տեղապահ Բեկչյանը պաշտոնապես հեռացել է Գերմանիայի հայ համայնքի հոգևոր առաջնորդի պաշտոնից

Պոլսո Հայոց պատրիարքի ընտրված տեղապահ Գարեգին արքեպիսկոպոս Բեկչյանը պաշտոնապես հեռացել է Գերմանիայի հայ համայնքի հոգևոր առաջնորդի պաշտոնից, այս մասին տեղեկանում ենք պատրիարքարանի ֆեյսբուքյան պաշտոնական էջից:

Պատրիարքի տեղապահի պաշտոնում ընտրվելուց հետո երկար տարիներ Գերմանիայի հայ համայնքի առաջնորդը հանդիսացած Բեկչյանը ստիպված էր համատեղել իր պարտականությունների կատարումը և՛ Գերմանիայում, և՛ Ստամբուլում:

Պոլսո Հայոց պատրիարքի ընտրությունների կազմակերպմանն ուղղված աշխատանքների մեկնարկը տալու համար նա, սակայն, տեղափոխվեց Ստամբուլ և ավելի ուշ հայտարարեց, որ եթե անգամ չընտրվի որպես պատրիարք՝ կշարունակի ապրել իր ծննդավայրում՝ Թուրքիայում:

Հիշեցնենք, որ 2016թ.-ի հոկտեմբերի 26-ին Պոլսո Հայոց պատրիարքարանը հայտարարել է 9 տարի շարունակ կոմայի մեջ գտնվող պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում է նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո Հայոց պատրիարքի նոր տեղապահ, որը կղեկավարեր ընտրական գործընթացը:

2017թ.-ի փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրություններում Արամ արքեպիսկոպոս Աթեշյանին հաղթած Գարեգին արքեպիսկոպոս Բեկչյանը, չնայած Աթեշյանի ու պետության կողմից միջամտություններին, ստանձնեց Պոլսո Հայոց պատրիարքի տեղապահի պաշտոնը և արդեն ձեռնամուխ է եղել պատրիարքի ընտրությունների կազմակերպմանը։ Պատրիարքի ընտրությունների անցկացման համար, սակայն, իշխանությունների կողմից սպասվող գրավոր համաձայնությունն այդպես էլ մինչ օրս չի հղվել հայ համայնքին: