Կապ չունի՝ խախտում անողը աջ, թե ձախ ղեկով մեքենա է քշում. «Աջ ղեկ» նախաձեռնության անդամները հանդիպել են նախարարի հետ

«Աջ ղեկ» նախաձեռնության անդամները, ովքեր դեմ են աջ ղեկով մեքենաներ գնելու և վաճառելու իրավունքի արգելանքին, հանդիպել են Տրանսպորտի և կապի նախարար Վահան Մարտիրոսյանի հետ:

Նախաձեռնության անդամներն այսօր Երևանում ավտոերթ անցկացրեցին՝ շարժվելով դեպի նախարարություն, ինչից հետո էլ հանդիպեցին Մարտիրոսյանի հետ: Հանդիպումը ընթանացել է լրագրողների մասնակցությամբ:

Ինչպես ասաց նախաձեռնության համակարգողներից Գևորգ Աճեմյանը, ամբողջ փաթեթը պետք է չեղարկել կամ հետ կանչել: Նա նշեց, որ հարցը պետք է քննարկել նորից, ձևավորել աշխատանքային խումբ, ներգրավել հասարակության ներկայացուցիչներին, փորձագետներին և լսել բոլոր կողմերի կարծիքը:

«Ոստիկանությունից տվյալներ կան, որոնց համաձայն` ավտոճանապարհային վթարների մինչև 11 տոկոսում են իրենց մասնակցությունն ունեցել աջ ղեկով մեքենաները: Ասում եք, որ սա արվում է իբրև թե անվտանգության ապահովման համար: Մենք ցանկանում ենք, որ դա հիմնավորվի»,- ասաց նա:

«Աջ ղեկ» նախաձեռնության համակարգողներից մեկն էլ՝ Արթուր անունով, ասաց, որ չկան տվյալներ այն մասին, թե այն ճանապարհային պատահարներից, որտեղ ներգրավված է աջ ղեկով մեքենա, քանի դեպքում են այս վարորդները մեղավոր:

«Չեմ կարծում, որ մեր երկրի սոցիալ-տնտեսական վիճակը թույլ է տալիս նման որոշումներ կայացնել: Հայաստանում բավական մեծ է աջ ղեկով մեքենաների քանակը և այդքան մարդ իր մեքենայի ձեռքը կրակն է ընկնելու, եթե նման որոշում կայացնենք: Դա խնայողություն է, տարիների ընթացքում գնել եմ այդ մեքենան, Աստված չանի, եթե պետք լինի վաճառել այն, լուծել, օրինակ, առողջական խնդիր, ես արդեն չեմ կարողանա վաճառել այն, ինչը սահմանափակում է»,- ասաց նախաձեռնության անդամներից մեկը:

Քաղաքացի Վահան Հովսեփյանն էլ նշեց, որ գույքի օտարման խնդիրը հակասահմանադրական է, ցանկացած քաղաքացի իրավունք ունի օտարել իր գույքը՝ վաճառել, և եթե իրենք ցանկանում է վաճառել աջ ղեկով իր մեքենան, պետությունը չի կարող արգելել:

«Աջ ղեկով ավտոմեքենաները շատ ավելի անվտանգ են, քան շատ արտադրողների ձախակողմյան ղեկով մեքենաները: Կարծում եմ, որ այսպիսի լուրջ փոփոխություններ ենթադրող ակտը պետք է լուրջ հիմնավորումներ ունենա, կատարվեն հետազոտություններ: Ինչո՞ւ ենք մենք վերցնում Ղազախստանի ու Բելառուսի օրինակը: Ինչո՞ւ չենք նայում, օրինակ, Ռուսաստանին, որը չի արգելել: Արդյոք այս առանց հետազոտությունների կայացրած որոշումն ամենաարդիականն է մեր տրանսպորտային երթևեկության ոլորտում: Այլ հարց չկա՞, որն ավելի արդիական է»,- ասաց Հովսեփյանը:

«Լոգոս» ՀԿ նախագահ Արա Մելիքջանյանն էլ նշեց, որ սա այն ամենակարևոր հարցը չէ, որ կա ոլորտում: Ըստ նրա՝ հսկայական խնդիրներ կան, օրինակ` հաղորդակցության ապահովումը, երթևեկության նշանները, գծանշանները, մարզեր տանող ճանապարհները:

«Այս ամենն ավելի մեծ խնդիրներ են ու հանգեցնում են պատահարների, քան այն, որ վարորդները աջ ղեկով մեքենաներ են վարում: Ո՞րն է խնդրի արդիականությունը: Հասարակության հետ նման խնդիր չկա: Եթե աջ ղեկով վարորդները ընկնում են պատահարների մեջ, չի նշանակում, որ իրենք են մեղավոր և որ պատճառը հենց աջ ղեկի հանգամանքն է: Նոր տարվա նախաշեմին ձեր կողմից «նվեր» արվեց, որ եկեք ամանորից հետո դարդը լացեք, թե ինչ կլինի, էլ չեք կարող ծախել, բայց որոշ ժամանակ կթողեք քշենք»,- ասաց նա: Նա հորդորեց նախարարին անձամբ տեսնել, թե ովքեր են իրենց անպարկեշտ պահում՝ տաքսիները, հանրային տրանսպորտի վարորդները:

«Կապ չունի աջ ղեկ է քշում, թե ձախ ղեկ, եթե խախտում է, խախտում է: Դա վարորդի խնդիր չի, վարորդի խնդիր չկա»,- արձագանքեց նախարար Մարտիրոսյանը:

Մարտիրոսյանն ասաց, որ դա անձնական գնահատական է, որ խնդիրը արդիական չէ: «Ձախ ղեկի վարորդը կարող է ասել՝ արդիական է, աջը կարող է ասել՝ ոչ: Ամեն մեկն իր կարծիքն ունի»,- ասաց Վահան Մարտիրոսյանը