«Մուշեղը գոռաց` էդ փողերն ով որ կարա ինձանից ստանա, ես նրա լավը… ու կրակեց». սպանության գործով վկա

Երևանի «Լիա» գեղեցկության սրահում մեկ տարի առաջ տեղի ունեցած սպանության գործով Երևանի Շենգավիր վրաչական շրջանի ընդհանուր իրավասության դատարանում ցուցմունք տվեց գործով վկա Արսեն Սիմոնյանը: Նա դատարանին հայտնեց, որ ամբաստանյալներից ճանաչում է միայն Պետրոս Իսրայելյանին: Վկան պատմեց, որ մեկ տարի առաջ նոյեմբերի 13-ին գնացել է «Լիա» գեղեցկության սրահ` մազերը կտրելու, սակայն, վարսահարդարը զբաղված է եղել և նա գնացել է Պետրոս Իսրայելյանի աշխատասենյակ` նրան տեսնելու:

«Գնացի վարսավիրն զբաղված էր, ասի իջնեմ ներքև, տեսնեմ ինչ է անում Գեղամը : Ինքը էդտեղ չէր, Գոռն էր` Գեղամի տղան: Գոռի հետ խոսում էինք, այդ պահին անծանոթ մարդիկ մտան ներս, ոչ մեկին չեմ ճանաչել: Գոռի հետ զրուցելու ընթացքում այլ մարդկանց հետ ներս մտավ նաև Մուշեղ Մուշեղյանը , վիճաբանություն սկսվեց Գևորգի և նրա միջև»,-պատմեց նա:

Մուշեղ Մուշեղյանը Գևորգից գումար է պահանջել` ասելով, որ փողերը պետք է տան:

«Մուշեղն ու Գևորգը վիճաբանում էին, կոպիտ ձևով իրար հետ խոսացին, Մուշեղը հայհոյանքներ հնչեցրեց, Գևորն էլ` նրան ու Մուշեղը կրակեց Գևորի վրա, հետո հարձակվեց Գևորգի վրա, Գևորգն էլ նրա վրա` դանակով: Հետո կրակոցներ սկսվեցին, Մուշեղը Գևորգի պարանոցից բռնել էր, մենք շոկի մեջ էինք, վարսավիրանոցի մուտքով փախել եմ, նստել եմ մեքենաս ու գնացել»,-ասաց նա:

Պետրոս Իսրայելյանն դեպքի ժամանակ այդ սենյակում չի գտնվել. «Ես չեմ տեսել Գեղամին, Գոռիկին հարցրեցի` ուր ա Գեղամը, ասեց հիմի կգա»:

Դատարանը հրապարակեց վկայի նախաքննական ցուցմունքը, ըստ որի վկան պատմել է. «Գեղամին ճանաչում եմ շուրջ չորս տարի: Նրա հետ մտերիմ հարաբերությունների մեջ եմ, նրա հետ մի քանի անգամ հանդիպել եմ վարսավիրանոցի նկուղային հարկում: Նոյեմբերի 13-ին Արմանի հետ իմ մեքենայով գնացել եմ Գեղամին տեսնելու, նաև մազերս կտրելու: Վարսավիրն զբաղված էր, մտա ներքև Գեղամին տեսնելու: Մտնելով ներս, տեսա Գոռին, այնտեղ էին նաև Արամն ու Գևորգը: 3-4 անձինք մտան ներս այդ ժամանակ, Մուշեղը շքամուտքի մոտ կանգնած ասաց` էդ փողերն ով որ կարա ինձանից ստանա, ես նրա լավը…: Գևորգը ասաց նրան, որ խելոք մնա, Մուշեղը գոտկատեղից հանեց ատրճանակը և կրակեց Գևորգի վրա, այնուհետև Գևորգը հանեց դանակը և հարձակվեց նրա վրա, Մուշեղը բռնելով Գևորգի պարանոցից սկսեց կրակել, նիշե էր սարքել»:

Նշենք, որ 2016թ. նոյեմբերի 13-ին տեղի ունեցած հրաձգության հետևանքով մահացել են 25-ամյա Գևորգ Ավետիսյանը եւ 30-ամյա Մուշեղ Մուշեղյանը: