Լուրերը, որ Սուպեր Սաքոյի աստղը Հոլիվուդի փառքի ծառուղում է՝ էժանագին PR քայլ էր

Ընդամենը ժամեր առաջ ինստագրամում սկսեցին նկարներ պտտվել, հայկական ռաբիս երաժշտարվեստի ներկայացուցիչները սկսեցին իրար աչքալուսանք տալ, թե Մասնավորապես երգչուհի Էմմին, ինչպես երևում է, խոսելու կարողությունն է կորցրել այս լուրը լսելուց hետո: Մինչդեռ շտապենք Էմմին ու Սուպեր Սաքոյի երկրպագուներին, եթե իհարկե կան այդպիսիք, հիասթափեցնել ու փաստել, որ շտապել են հիանալու ու երգչին շնորհավորելու հարցում. Հոլիվուդի փառքի ծառուղին առաջիկայում չի ունենալու այն «մեծ» պատիվը՝ կրելու այս «գերաստղի» անունը: Այս մասին գրում է  losarmnews.com-ը:

Իր հասակին ու տաղանդին համապատասխան այս փոքր աղմուկը հստակ մտածված, բայց ցավոք, պրիմիտիվ սյուժե էր՝ հանդիսատեսին աչքին թոզ փչելու ու կարծիք ստեղծելու, թե իրեն «սուպեր» հորջորջող երգիչն ունի այնքան արժանիքներ, որ կարող էր հայտնվել պատվո ճեմուղում:

Ու այս ամբողջ աղմուկն այն պարզ պատճառով, որ հայ շոու-բիզնեսի ներկայացուցիչների կողքին տեսահոլովակներում թռվռացող պուճուր-մուճուր տղան, օրերս կայացած իր համերգի ժամանակ Հոլիվուդի քաղաքապետարանի կողմից ստացած պատվոգիրը՝ ճանաչել Սուպեր Սաքոյին որպես աստղ այնպես ներկայացվեց, որ շատերի մոտ տպավորություն ստեղծվեց, թե իր անունը կրող աստղը պետք է տեղադրվի Հոլիցուդի փառքի ծառուղիում:

Հետաքրքիր է թե ում համարձակ ֆանտազիան է թույլ տվել հանդգնելու ու հանդիսատեսին նման խաբեության մեջ ներքաշելու:

Կարճ ասած՝ էժանագին հնարք ու վառ երևակայություն, ոչ ավելին: Եթե իրատես լինենք, այ չէինք զարմանա, եթե երգչի աստղը դրվի օրինակ իրենց բակի պուրակում կամ օրինակ գետնանցումում:

Մինչդեռ, ինչպես երևում է, երգիչը վատ ախորժակ չունի: Սուպեր Մարիոյից բեմական կեղծանունը գողացած երգիչն իր աստղը պատկերացրել է համաշխարհային աստղերի կողքին։ Աստղիկը ցանկանում էր գտնվել նույն հարթության վրա ինչ օրինակ շանսոնյե Շառլ Ազնավուրինը, երգչուհի Շերինը կամ ռեժիսոր Ռուբեն Մամուլյանինը: Այստեղ են ասել՝ «Ո~վ մարդկային արդարություն, թող որ թքեմ քո ճակատին»:

Առանց գույները խտացնելու Ձեզ պատրաստեք ընդհուպ նրան, որ երգիչը գուցե շուտով ցանկություն հայտնի , որ իր արձանը տեղադրեն շատ չէ, ասենք՝ Մադամ Տյուսոյի թանգարանում: