Տավարի մսի գինը կրկին բարձրանալու է, չամիչն էլ իրեն կթանկացնի Ամանորի նախաշեմին

Քաղաքացիներն այնպիսի տպավորություն ունեն, որ գնաճը շարունակվելու է, ով ինչ ուզում՝ թանկացնում է և միայն իր կյանքն է վատանում:

«Եթե մենք վերցնենք այս կամ այն ապրանքի գինը և համեմատենք միջազգային շուկայի գների հետ, ապա հետևյալ արդյունքն է ստացվում: Այնտեղ, որտեղ գնանկում կա, մեր երկրում չկա, բայց, եթե գնաճ կա, միանգամից զգացվում է Հայաստանում: Օրինակ՝ միջազգայում շուկայում 30 տոկոսով նվազել է շաքարավազի գինը, իսկ Հայաստանո՞ւմ: Ավելին՝ եթե միջազգային շուկայում կարագի գինը թանկացել է, ապա կաթնամթերքինը նվազել է: Մեզ մոտ երկուսն էլ թանկացել են: Ըստ կանխատեսումների՝ տավարի մսի գինն էլի է թանկանալու, որովհետև եթե գյուղացին կարողացավ պահել իր կենդանուն՝ դեֆիցիտ է առաջանալու: Եվ, եթե մենք գոնե կերակրի հարցով գյուղացուն օգնած լինեինք, ամեն ինչ այլ կլիներ: Ամանորի նախաշեմին կթանկանա չամիչը: Պարսկական չամիչը շուկայում քիչ է լինելու, սա ենթադրում է, որ Իրանն ունի խնդիր, հետևաբար, այլընտրանք չկա ու թանկ գնով ենք այն ձեռք բերելու»,-լրագրողների հետ հանդիպման ժամանակ ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

Նրա խոսքով՝ այս գնաճը պետությանը ձեռնտու է, քանի որ շատ հարկ են հավաքում:

«Շատերը սա կապում են պետության՝ գործադիր իշխանության կողմից գնաճը հովանավորելու հետ»,-նկատեց «Իրազեկ և պաշտպանված սպառող» ՀԿ նախագահը: