Դիտարկումներ՝ ԿԳ նախարար Լևոն Մկրտչյանի ՇՊՀ այցի շուրջ

Կրթության և գիտության նախարար Լևոն Մկրտչյանը սեպտեմբերի 27-ին այցելեց Շիրակի Պետական Համալսարան ՝տեղում ծանոթանալու իրավիճակի հետ: Պարոն Մկրտչյաինի հետ հանդիպեցինք նաև մենք՝ ՀՀ նախագահին և վարչապետին բաց նամակի հեղինակներս՝ ես և Հովհաննես Խորիկյանը:

Նախարար Լևոն Մկրտչանն արդեն մեկնաբանել է իր այցի արդյունքները և ստացած տպավորությունները:

Նախ շատ զարմանալի է, որ պարոն նախարարի մոտ զարմանք է առաջացել, որ «ասենք պատմության ուղղության մեջ նույն կուրսը երկրորդ տարին կրկնում է նույն առարկան»:

Հարգարժան պարոն նախարարին տեղեկացնեմ, որ այդ խնդիրը միայն պատմության բաժնին չի վերաբերում: Ձեզ մոտ սխալ կարծիք է ստեղծվել: Այդ խնդիրը ունեն բոլոր բաժինները, քանի որ ռեկտոր Սահակ Մինասյանի թեթև ձեռամբ ուսումնական պլանները փոփոխվել են բոլոր բաժիններում, որի արդյունքում ստեղծվել է խայտառակ իրավիճակ:

Ինչ վերաբերվում է նախարարի նշած «անձնավորված» հարաբերություններին,ապա հենց նույն ռեկտորն է դրա հեղինակը,ով հատուկ «անձնավորված» վերաբերմունք ունի պրոֆեսորադասախոսական անձնակազմի նկատմամբ և զբաղված է տարրական հովանավորչությամբ:

Շատ զարմացա պարոն Մկրտչյանի նշած գոյություն չունեցող «խորքային անլուծելի հարցեր չլինելուն»: Այո, բոլոր հարցերն էլ լուծում ունեն: Սակայն ի՞նչ, ամեն անգամ երբ պարոն Մինասյանը ապօրինություններ և կամայականություններ է անելու Ձե՞զ ենք դիմելու:

Այսինքն ,ըստ պարոն Մկրտչյանի, այն, որ ռեկտորի կողմից պարտադրված ուսումնական պլանների փոփոխման պատճառով խաթարվել է ամբողջ ուսումնական գործընթացը և Ձեր հրահանգով այն պետք է շատ արագ փոփոխվի, դա նորմա՞լ է: Բոլոր բուհերում ընթանում է հանգիստ ուսումնական պրոցես, իսկ մենք մեկ ամիս դասեր անելուց հետո պետք է փոփոխենք ուսումնական պլանները: Դուք դա նորմա՞լ եք դիտում: Զարմանալի է: Դա,ինչպես Դուք էիք նշել ուսանողների հետ հանդիպման ժամանակ, հանցագործություն է և քրեորեն պատժելի: Եթե պարոն Մինասյանը քրեորեն պատժելի արարք է գործել, ապա ինչո՞ւ չեք դիմում դատախազություն:

Պարոն Մկրտչյան,Դուք «խորքային հարց» չեք դիտում նաև ռեկտոր Մինասյանի «ինտեգրված» ուսուցման ձևը, որը Հայաստանում չի կիրառվում: Սահակ Մինասյանի կողմից դրա ներդրումը բուհում ապօրինի է և անօրինական: Սա ևս հանցագործություն է, որն, ըստ Ձեզ, ևս ուղղելի՞ է:

Կամայական է նաև կրեդիտային համակարգով նախատեսված շաբաթական ծանրաբեռնվածությունը 24-30-ն ժամից 12-ի իջեցումը և դասաժամերի 50 % կրճատումը:

«Խորքային» չէր նաև այն,որ ռեկտոր Մինասյանը չէր ցանկանում բարձր ՄՈԳ ունեցող ուսանողների վարձավճարները զեղչել:

Ես շատ ուրախ եմ, որ Ձեզ շատ են դուր եկել մեր ուսանողները: Մենք ևս նրանցով հիանում ենք: Չգիտես ինչու,պարոն Մկրտչյանը կենտրոնացել է դասախոսների միջանձնային հարաբերությունների վրա, մոռանալով, թե այդ նույն դասախոսներն ինչ խորքայի հարցեր բարձրացրեցին, որոնք վերաբերվում են ԲՈՒՀ-ում մեծ թափ առած ռեկտորի անօրինականություններին, կամայականություններին, ապօրինություններին, որոնք քրեորեն պատժելի են, ինչպես ասում եք Դուք:

Հ.Գ.Ուսանողների մոտ քրեորեն պատժելի զանցանքներ գործած ռեկտոր Մինասյանի գործունեության վերաբերյալ արտահայտություններ արած նախարար Լ.Մկրտչյանը իր մեկնաբանություններում ասում է, որ դրանք «խորքային անլուծելի հարցեր» չեն...Հետաքրքիր է,բա ի՞նչ են:

Գագիկ Համբարյան. Ֆեյսբուք