Զվարթնոցի և Գառնու տաճարների մուտքավճարների թանկացումը կբերի ծառայությունների որակի բարձրացման. Մեխակ Ապրեսյան
Այսօր՝ օգոստոսի 9-ին, լրագրողների հետ հանդիպման ժամանակՀՀ տնտեսական զարգացման և ներդրումների նախարարության զբոսաշրջության պետական կոմիտեի նախագահի առաջին տեղակալ Մեխակ Ապրեսյանը կարևորեց ՀՀ-ում տեղական փառատոնների անցկացումը:
«Նման փառատոնները հնարավորություն են տալիս տվյալ տարածաշրջանում զբոսաշրություն զարգացել: Տեղի ավանդույթները, մշակութային ժառանգությունը հասանելի դառնում ներքին ու արտաքին շուկայի համար»,- ընդգծեց Ապրեսյանը:
Մեխակ Ապրեսյանը շեշտեց, որ պետական քաղաքականություն իրականացնելիս պետությունը հաշվի չի առնում մարզի՝ Երևանից հեռավորությունը: Նրա խոսքով՝ Կառավարությունը շահագրգռված է զարգացնել սահմանամերձ գոտիներում զբոսաշրջությունը և դրան միտված ամենօրյա աշխատանք է տանում:
«ՀՀ մարզերում ենթակառուցվածքների, ծառայությունների որակի և բազմազանության հետ կապված խնդիրներ ունենք և պետք է զարգացնենք: Պետք է կարողանանք հասցնել այն աստիճանի, որ կարողանանք բնական զբոսաշրջություն ապահովել, ինչը կբերի նաև տնեսության զարգացման: Այո՛, ծառայություններ մատուցելու հետ կապված աճ ունենք, սակայն դեռևս անելիքները շատ են»,- շարունակեց Ապրեսյանը:
Վերջինիս խոսքով՝ իրենք դեռևս ՀՀ-ում տեղական փառատոնների անցկացման գործում վերջնակետին չեն հասել, սակայն հաջողություններ ունեն: Ապրեսյանը շեշտեց՝ արդեն իսկ կան մի շարք տեղական կայացած փառատոներ՝ գինու, մեղրի, խորովածի և այլն, որոնք ամեն տարի նոր թափով են անցկացվում։
«Մենք ունենք կայացած փառատոններ, որոնք հայտնի են ոչ միայն Հայաստանում, այլև միջազգային շուկայում: Մեր փառատոններն արդեն իսկ ներառվում են զբոսաշրջային փաթեթներում, լուսաբանվում են մի շարք միջազգային լրատվամիջոցների կողմից: Մենք փորձում ենք այնպես անել, որ զբոսաշրջիկն իր ճանապարհորդությունը պլանավորելիս որոշի գալ Հայաստան հենց փառատոնին մասնակցելու: Մեր ծրագիրը հեռանկարային է, քանի որ մենք տեսնում ենք զբոսաշրջիկների ուրախությունը նման փառատոններին մասնակցելու ժամանակ»,- ընդգծեց նա:
Մեխակ Ապրեսյանն անդրադարձավ նաև Զվարթնոցի և Գառնու տաճարների մուտքավճարների թանկացմանը և հույս հայտնեց, որ գնի բարձրացմամբ կբարելավի նաև ծառայությունների մատուցման որակը:
«ՀՀ զբոսաշրջային արդյունքը միջազգային շուկայում մրցունակությամբ չի զիջում, մենք մրցունակության եզրի վրա գնում ենք: Ցանկացած թանկացում հաճելի չէ, կարող է բացասաբար անդրադառնալ: Սակայն այստեղ այլ հարց կա, որ մարդ ավելի թանկ է վճարում ու ավելի լավ ծառայություներ ստանում, ավելի բավարարված է զգում: Կարծում եմ՝ թանկացումից հետո մատուցված ծառայությունների որակի բարձրացում է լինելու»,-եզրափակեց Մեխակ Ապրեսյանը՝հավելելով, որ երկրում աճել է նաև ներքին զբոսաշրջությունը: