Չեխիայի խորհրդարանի ներկայացուցիչն այցելել է ՀՀ դեսպանատուն
Հուլիսի 3-ին Պրահայում ՀՀ դեսպանություն այցելել է Չեխիայի Հանրապետության խորհրդարանի Պատգամավորների պալատի արտաքին հարաբերությունների կոմիտեի նախագահ, նախկին առաջին փոխվարչապետ և արտաքին գործերի նախարար, TOP-09 աջակողմյան կուսակցության հիմնադիր, իշխան Կարել Շվարցենբերգը (Karel Schwarzenberg):
Հյուրընկալելով չեխ անվանի գործչին՝ դեսպան Տիգրան Սեյրանյանը նշել է, որ մեծ պատիվ է համարում տարիներ անց կրկին ողջունելու Կարել Շվարցենբերգին Հայաստանի դեսպանությունում։ 2011 թվականին նա, որպես Չեխիայի արտաքին քաղաքական գերատեսչության ղեկավար, ՀՀ ԱԳ նախարար Էդվարդ Նալբանդյանի հետ միասին մասնակցել է Հայաստանի դեսպանության պաշտոնական բացման արարողությանը։
Զրույցի ընթացքում քննարկվել են ղարաբաղյան հիմնախնդրի կարգավորմանն ուղղված ջանքերը, տարածաշրջանային խնդիրներ։ Չեխ քաղաքական գործիչն ընդգծել է Լեռնային Ղարաբաղի հիմնախնդրի բացառապես խաղաղ բանակցությունների միջոցով՝ ԵԱՀԿ Մինսկի խմբի եռանախագահների միջնորդությամբ լուծման այլընտրանքի բացակայությունը։
Հյուրի խնդրանքով դեսպան Սեյրանյանը ներկայացրել է սիրիահայերին հուզող խնդիրները և դրանց լուծման ուղղությամբ ՀՀ իշխանությունների կողմից իրականացվող քայլերը:
Դեսպան Սեյրանյանը բարձր է գնահատել չեխ պատգամավորի՝ 2015թ. ապրիլի 14-ին Պատգամավորների պալատի արտաքին հարաբերությունների կոմիտեի, իսկ 2016թ. ապրիլի 25-ին՝ արդեն Պալատի կողմից Հայոց ցեղասպանությունը ճանաչող և դատապարտող բանաձևերն ընդունելու ուղղությամբ գործադրած բացառիկ ջանքերը:
Նա երախտագիտություն է հայտնել նաև չեխ-հայկական միջպետական և միջխորհրդարանական հարաբերությունները զարգացնելու և խորացնելու գործում Կարել Շվարցենբերգի ունեցած անգնահատելի ավանդի համար՝ ընգծելով, որ 2012թ. Շվարցենբերգի նախաձեռնությամբ Երևանում հիմնվեց Չեխիայի դիվանագիտական ներկայացուցչությունը։
Ի նշանավորումն Հայաստանի և Չեխիայի միջև համագործակցության խորացման գործում Կարել Շվարցենբերգի ներդրման՝ Հայաստանի դեսպանը նրան հանձնել է Հայաստանի Հանրապետության Ազգային ժողովի Պատվո Մեդալը: