Արդեն տևական ժամանակ է՝ թույլ չեն տալիս տեսակցել Շիրխանյանին. փաստաբանը մանրամասներ է հայտնում գործից (տեսանյութ)
Այսօր՝ փետրվարի 13-ին, լրագրողների հետ հանդիպման ժամանակ Պաշտպանության նախկին փոխնախարար, զինված խմբի գործով կալանավորված Վահան Շիրխանյանի փաստաբան Հայկ Ալումյանը ներկայացրեց մանրամասներ Եվրոպական դատարանի նոր հարցադրումների մասին՝ Շիրխանյանի հարցով և այն մասին, որ փաստաբանին արգելում են տեսակցել իր պաշտպանյալին:
Նրա խոսքով՝ փետրվարի 11-ից Վահան Շիրխանյանին թույլ չեն տալիս տեսակցել նաև իր պաշտպանի հետ:
Նա նշեց, որ Ստրասբուրգից Վահան Շիրխանյանի փաստաբանները, ովքեր նրան ներկայացնում էին Եվրոպական դատարանում, եկել էին Հայաստան՝ հանդիպելու Վահան Շիրխանյանին, սակայն նրանց տեսակցությունը նույնպես արգելվեց:
Փաստաբանի պնդմամբ՝ այս ամենի հետո, Վահան Շիրխանյանի կապն արտաքին աշխարհի հետ միայն իր միջոցով էր կատարվում, սակայն վիջինիս նույնպես արգելեցին հանդիպել Վահան Շիրխանյանի հետ:
«Կարելի է ասել, որ Վահան Շիրխանյանը կատարյալ մեկուսացման մեջ է պահվում»,- ասաց նա:
Հայկ Ալումյանը նկատեց՝ սա չլսված երևույթ է և պատճառաբանում են, որ Վահան Շիրխանյանը չի ցանկացել դուրս գալ իր խցից և ներկայանալ տեսակցությունների համար նախատեսված սենյակ:
«Արդեն 6 ամիս է՝ Վահան Շիրխանյանը չի կարողացել ինքնուրույն գալ տեսակցությունների սենյակ: Միշտ իրեն օգնել են, թևատակերից բռնած բերել, հասցրել ինձ հետ տեսակցության: Հիմա իրավիճակը փոխվել է, այլևս իրեն չեն էլ ուզում օգնել, գալ տեսակցելու իր պաշտպանի հետ»,- շեշտեց Հայկ Ալումյանը:
Փաստաբանն առաջարկել է, որպեսզի իրեն թույլատրեն խցում տեսակցել Վահան Շիրխանյանի, սակայն ստացել է մերժում: «Մերժման պատրվակը եղել է այն, որ, քանի որ այն արգելված գոտի է, այնտեղ մուտքն արգելված է նաև պաշտպանների համար: Խցում կան ուրիշ մարդիկ, ուրիշ քրեական գործերով, դա է եղել պատրվակը: Իսկ պատճառը խորքային է: Պարզապես իրենք ցանկանում են կոտրել պարոն Շիրխանյանի դիմադրությունը հոգեբանորեն նրան ընկճել, կոտրել դիմադրելու ցանկությունը, որը իրենց չի հաջողվելու»,- պնդեց փաստաբանը:
Հայկ Ալումյանը նաև ընդգծեց, որ ՄԻԵԴ-ը Վահան Շիրխանյանի առողջական վիճակի հետ կապված 5 տարբեր հարցեր է ուղղել կառավարությանը, որոնց մինչև փետրվարի 22-ը պետք է պատասխաններ տրվեն:
Մանրամասները՝ տեսանյութում: