Շվեդիայում ոստիկանների պատճառով 32-ամյա հայ է մահացել. գործը փորձում են կոծկել
Operativ.am-ի ինֆորմացիայով` 2017 թվականի փետրվարի 6-ին` Շվեդիայի Օրեբրո քաղաքում, ՀՀ քաղաքացի, Երևան քաղաքի բնակիչ, 32-ամյա Դ. Բարսեղյանի առողջական վիճակը վատացել է: Նրա երկու ընկերներն ավտոմեքենայով նրան տարել են դեպի հիվանդանոց, սակայն նրանց ճանապարհը փակել են տեղի ոստիկանները, նրանց իջեցրել ավտոմեքենայից: Այդ պահին, Դ. Բարսեղյանը կորցրել է գիտակցությունը, վայր ընկել ոստիկանների աչքի առաջ, որից հետո մի կերպ բարձրացել, հենվել սյանը և սկսել փսխել:
Այդ ընթացքում նրան ուղեկցող երկու տղամարդիկ անընդհատ նշել են, որ շտապօգնություն կանչեն, քանի որ մարդը շատ վատ է զգում, սակայն նրանք չեն կանչել, անգամ չեն թողել, որ ընկերները մոտենան և օգնեն: Հնչեցրել են հայհոյանքներ, բռնել ձեռքերից և տարել ոստիկանության բաժնի մեկուսարան, որտեղ նույնպես որևէ բուժաշխատող չեն հրավիրել: Շուրջ մեկ ժամ մնալով անօգնական վիճակում` Դ. Բարսեղյանը մահացել է:
Ոստիկանությունը փորձել է կոծկել դեպքը, սակայն, այն բանից հետո, երբ այնտեղ գործող փաստաբան Մարկ Սաֆարյանը և տեղական լրատվամիջոցներն աղմուկ են բարձրացրել, ոստիկանների հանցավոր անգործության համար, դատախազը քրեական գործ է հարուցել:
Ներկա պահին կա մտավախություն, որ այդ քրեական գործը կտարվի փակուղի, և դեպքը կկոծկվի:
Նշենք, որ Դ. Բարսեղյանն ընդամենը չորս օր էր, ինչ գտնվում էր Շվեդիայում: