Զարուհի Հովհաննիսյանը՝ խառնամուսնությունների վերաբերյալ հանրության կարծիքի մասին

Այսօր՝ հունվարի 11-ին, լրագրողների հետ հանդիպման ժամանակ «Ընդդեմ կանանց նկատմամբ բռնության» կոալիցիայի համակարգող Զարուհի Հովհաննիսյանը խոսեց Հայաստանում խառնամուսնությունների և հանրության վերաբերմունքի, արձագանքների, «Մարաշլյան» ֆոտոստուդիայի լուսանկարի շուրջ:

Զարուհի Հովհաննիսյանի պնդմամբ՝ խնդիրն ունի մի քանի ասպեկտ.

1. Խտրական վերաբերմունք, որը հասարակության մեջ առկա է:

2. Կնոջ նկատմամբ առանձնակի վերաբերմունք, վերահսկողության վարքը հանրության կողմից, նրա անձնական կյանքի վերաբերյալ:

3. Պետական քաղաքականությունը, որը նպաստում է բավական խտրական և երբեմն ազգայնամոլական կարծիքներ հնչեցին և դրանք անպատասխան են թողնվում հենց պետական ատյանների կողմից:

«Խտրականությունն առավել հաճախ տեղի է ունենում կանանց նկատմամբ, երբ վերաբերվում է մարդու անձանական կյանքին, նրա ընտրություններին: Քանի որ կինն ավանդական հասարակության մեջ ընկալվել է որպես համայնքի սեփականություն, և բոլոր տղամարդիկ որոշում են կայացրել, թե կինն ում հետ պետք է ամուսնանա և կինը հանդիսացել է այսպես ասած ապրանքային հատկանիշներ ունեցող. «Լավ ապրանք ենք տալիս և այդ պատճառով վերահսկում ենք, թե ում հետ պետք է ամուսնանա և ինչպես պետք է շարունակվի այդ գենը»,-որովհետև, հիմնական խնդիրը վերաբերվում էր գենի շարունակությանը, որ հայի գենը կտրվում է, կամ չի կտրվում, խառնվում է կամ չի խառնվում»,- ասաց նա:

Նրա խոսքով՝ այստեղ խախտվել է կնոջ անձնական կյանքի իրավունքը:

Բանախոսի դիտարկամբ՝ պետական այրերի կողմից հնչեցված տարբեր կարծիքներ ոչ միայն անպատասխան են մնում, այլ նաև վերջիններս հետագայում ունենում են առաջխաղացումներ: