Չպետք է հավատալ ԵԱՀԿ-ի կողմից արված ցանկացած հայտարարությանը. Թևան Պողոսյան (տեսանյութ)

Այսօր՝ օգոստոսի 26-ին, լրագրողների հետ հանդիպման ժամանակ ՀՀ ԱԺ պատգամավոր Թևան Պողոսյանը խոսեց Արցախյան հարցի կարգավորման գործընթացի, ներքաղաքական իրավիճակի մասին:

Անդրադառնալով բանակցային գործընթացին, թե ինչ փուլում է այն գտնվում, և ինչ է սպասվում, Թևան Պողոսյանը նշեց. «Փաստորեն, մենք տեսել ենք 2 այսպես ասած միջոցառում, որն անվանվում է բանակցային գործընթաց՝ Վիեննայի և Սանկտ Պետերբուրգի հանդիպումը: Վիեննայի հանդիպման ժամանակ համանախագահների կողմից եղել է ընդունված մի տեքստ, որտեղ իրենք ասել են, որ կողմերը համաձայնվել են ինչ-որ քայլերի՝ վստահության բարձրացման քայլերի, որից հետո կանցնի գործընթացը:

Հիմա նայենք, թե ինչ է դա իրենից ներկայացնում. 

• Դիտորդական առաքելության ավելացում

• Հետաքննման մեխանիզմներ

ԵԱՀԿ-ն ունի մեխանիզմ՝ բյուջետային գրասենյակը, որը քննարկումներ է անում և այդ կոմիտեն պետք է նստի, հաստատի իր բյուջեն: Ամեն անգամ, այդ կոմիտեի քննարկումների ժամանակ, որը, եթե չեմ սխալվում 3 անգամ նույնիսկ նիստ են ունեցել և 3 անգամ Ադրբեջանի կողմը վետո է դրել: Այնպես որ, սրանից հետո, չպետք է հավատալ ցանկացած ԵԱՀԿ-ի նախագահող երկրների դեսպանների կամ որևէ մի ներկայացուցչի հայտարարությանը. «Չգիտեմ ի՞նչ է պետք անել, ո՞նց է պետք անել»: Ես վստահ եմ, որ իրենք շատ լավ տեղյակ են այդ ներքին իրավիճակից: Պետք է հարցը դնենք Ադրբեջանի կողմի առջև, թե ինչու է վետո դնում կամ վիժեցնում այս գործընթացը»,-ասաց ՀՀ ԱԺ պատգամավոր Թևան Պողոսյանը:

Նրա պնդմամբ՝ Սանկտ Պետերբուրգում էլ խոսեցին, որ շուտով կլինի ինչ-որ առաջընթաց, բայց դրանից հետո տեսանք, որ նույնիսկ համատեղ հանդիպում չի լինում և ասվում էր. «Հուլիսին Փարիզում, պետք է լինի հանդիպում», որը տեղի չունեցավ, իսկ օգոստոսին էլ՝ առանձին-առանձին հանդիպումներ էր, որտեղ այլ խնդիրներ էր քննարկվում, բայց բանախոսի վստահմամբ՝ Արցախի հարցն էլ է քննարկվել, բայց ոչ միասնական:

Մանրամասները՝ տեսանյութում: