Շտայնմայերի հայտարարությունը պատահական չէ, և այն իր մեջ պարունակում է էսկալացիայի կրկնություն. Լարիսա Ալավերդյան (տեսանյութ)

Այսօր՝ հուլիսի 1-ին, լրագրողների հետ հանդիպման ժամանակ ազգագրագետ Հրանուշ Խառատյանը, բնապահպան Կարինե Դանիելյանը և «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը խոսեցին ԼՂ-ի հիմնախնդրի, փոխզիջումների, Գերմանիայի արտգործնախարար, ԵԱՀԿ գործող նախագահ Ֆրանկ-Վալտեր Շտայնմայերի տարածաշրջանային այցի մասին:

Լարիսա Ալավերդյանի խոսքով՝ Ֆրանկ-Վալտեր Շտայնմայերի հայտարարությունը պատահական չէ, որն իր մեջ պարունակում է էսկալացիայի կրկնություն:

«Նա ասում է. «Ստատուս քվոյի շարունակությունը չի կարող լինել, որովհետև դա իր մեջ պարունակում է նոր էսկալացիայի հնարավորություն»: Դա ոչ այն ինչ է, քան կոչ Ադրբեջանին կրկնել այս էսկալացիան»,- ասաց «Ընդդեմ իրավական կամայականությունների» ՀԿ նախագահ, ՀՀ մարդու իրավունքների նախկին պաշտպան Լարիսա Ալավերդյանը:

Նրա պնդմամբ՝ Հայաստանը պետք է թույլ չտար, որ Արցախը դուրս մղվեր բանակցություններից և այն օրը, երբ Արցախը դուրս է մղվել, Հայաստանը պետք է չնստեր որևէ բանակցային կամ հանդիպումների սեղանի շուրջ:

«Ես ուզում եմ հստակեցնել, որ մենք ուզում ենք այս երեք կանանցով մի փաստաթուղթ ստեղծել, որը բաղկացած կլինի երեք մասից.

1. Հայաստանի իշխանությանն ենք դիմելու
2. Միջազգային հանրությանը՝ հանձինս ԵԱՀԿ-ի և Մինսկի խմբի 
3. Ժողովրդին

• Հայաստանի իշխանություններին և Մինսկի խմբին դիմելով` մենք ասելու ենք, որ մենք մերժում ենք Մադրիդյան սկզբունքների կամ նրա շուրջը որևէ փատաթղթերի հիման վրա բանակցությունների շարունակությունը և այս Մադրիդյան սկզբունքները ուղղակի փակուղի են:

• Կազանի գործընթացը համարում ենք ոչ միայն անպտուղ, այլև մենք դա համարում ենք վտանգավոր և հակասող տարածաշրջանում ապրող բոլոր ժողովուրդների անվտանգությանը և նրանց գոյությանը: Կոչ ենք անում հրաժարվել այս անորոշ և երկիմաստ բոլոր այն թեզերից, որոնք խեղաթյուրում են Արցախի հիմնահարցը և ազգային ազատագրական պայքարը ներկայացնում են որպես 1992 թվականի Ադրբեջանի կազմում ԼՂՀ-ի այն էլ մեկ այլ վաղուց լուծարված ԼՀՄ-ի սահմաններում ինքնորոշման իրավունքի վրա»,-նշեց Լարիսա Ալավերդյանը:

Մանրամասները՝ տեսանյութում: