Հովիկ Աբրահամյանը հանրաքվեից հետո Կառավարության դեմքերը կթարմացնի
«Իրատես de facto» թերթը գրում է. «Մեր տեղեկություններով՝ Հովիկ Աբրահամյանը պատրաստվում է հանրաքվեից հետո թարմացնելու հայոց բազմաչարչար կառավարությունը՝ նոր դեմքերով: Ընդ որում, կարծես պայմանավորված էր, որ գործադիրում ներկայացված կլինի նաեւ ՀՅԴ-ն: Սակայն շաբաթն ուրբաթից շուտ եկավ, և ՀՅԴ-ն հայտարարեց, որ կողմ չի քվեարկելու բյուջեին, ինչն էլ նշանակում է՝ ՀՅԴ-ն առաջին հերթին դեմ է Հովիկ Աբրահամյանին: Ի դեպ, ոմանք համոզված են, որ այս վարքագծով ՀՅԴ-ն «բան» է հասկացնում Հովիկ Աբրահամյանին՝ իր ուզել-չուզելիքի մասով: Չնայած, ըստ մեր աղբյուրների, ՀՅԴ-ում ևս խնդիրներ կան.
125-ամյա «ծերուկը» երկգլխանի է դարձել, և Յանուսի նման չի կողմնորոշվում՝ որ կողմի վրա թեքի գլուխները: ՀՅԴ-ի մի մասը՝ Դավիթ Լոքյանի «բլոկը», կողմ է դեկտեմբերին կոալիցիայի մեջ մտնելուն: Հիշենք, որ Լոքյանը ոչ միայն Հովիկ Աբրահամյանի հետ քավոր-սանիկ է, այլեւ ոչ անհայտ ընկեր Հրանտի դաշնակցական օպոնենտ, ամերիկյան թևի ներկայացուցիչ Վիգեն Հովսեփյանի հետ է շատ մոտ:
Լոքյանը «բաջանաղորեն» մոտ է նաև այսօր ՀՅԴ-ում «ուժեղ» խաղացող, ընկեր Հրանտի մտերիմ (նաեւ՝ Սամվել Կարապետյանի հետ մտերիմ) Աղվան Վարդանյանի հետ: Իսկ ընկեր հրանտի թևն այս պահին հակված չէ մտնելու կոալիցիա մի շարք պատճառներով, առաջին հերթին՝ «փոքր» պորտֆելներով մեծ պատասխանատվություն չկիսելու»:
Ավելի մանրամասն՝«Իրատես de facto» թերթի այսօրվա համարում: