Հերմինե Նաղդալյանը վրդովվեց Արամ Մանուկյանի՝ մարմնավաճառների մասին հայտարարությունից հետո
ԱԺ մայիսի 5-ի արտահերթ նիստին ԱԺ ՀԱԿ խմբակցության պատգամավոր Արամ Մանուկյանը վարման կարգի վերաբերյալ ելույթ ունեցավ՝ քննադատելով «Եկամտահարկի մասին» օրենքը:
«Այս օրենքով շուտով ամբողջ հանրապետության տարածքով կհայտնվեն «հանրապետական փոդրաչիներ»՝ հավաքագրելով մարդկանց արտագնա աշխատանքի համար: Կլինեն իրավաբանական մի քանի անձինք, մոնոպոլ ռեզիդենտներ: Անմոռուկներ բաժանելու նման կլինի, երբ վարորդներին ասում էին՝ եթե չվերցնեք, ու մեքենաներին չփակցնեք, պետավտոտեսուչը կկանգնեցնի: Տասը ծիծաղում էր, հարյուրը՝ վերցնում: Նույնն էլ այս դեպքում կլինի: Այս օրենքի անհրաժեշտությունը ծագել է, քանի որ 195 հազար մարդով աշխատանքային ռեսուրսը պակասել է: Հայ բազմաթիվ մարմնավաճառներ են դուրս գնում: Լավ բիզնես են անում. մի օրենք էլ բերեք ու սա էլ կարգավորեք»,- ասաց Արամ Մանուկյանը:
Մարմնավաճառների նկատմամբ հարկ սահմանելու հայտարարությունից անմիջապես հետո ԱԺ փոխխոսնակ Հերմինե Նաղդալյանն իր վրդովմունքը հայտնեց՝ ասելով. «Ազատ ամբիոնի ու ազատ խոսքի այս գայթակղությունն այնքան լավ է, որ արգելակները թուլանում են: Ինչո՞ւ անպայման պետք է կոպիտ խոսել: Ոնց որ թշնամական պետություն ու կառավարություն լինենք, ինչո՞ւ եք այդպես խոսում: Այս օրենքները սրճարաններում չեն գրվում, ինչո՞ւ եք այդքան կոպիտ խոսում: Ինչո՞ւ եք քամահրանքով ու մոլուցքով խոսում, սա մեր երկիրն է»: