Սև շոկոլադն ընդդեմ ճարպակալման և դիաբետի
Սև շոկոլադն օգնում է կանխել ճարպակալումը և երկրորդ տիպի շաքարային դիաբետի զարգացումը: Պարզվել է, որ կակաո լոբիների մեջ պարունակվող ֆլավոնոիդները կանխում են քաշի ավելացումը և նվազեցնում են շաքարի մակարդակն արյան մեջ: Այս հետազոտությունների արդյունքները հրապարակվել են Agricultural Food and Chemistry ամսագրում:
Սև շոկոլադը հարուստ է ֆլովոնոիդներով: Ֆլովոնոիդները քիմիական նյութեր են, որոնք ավելացնում են արյան հոսքն անոթների լայնացման շնորհիվ: Կակաո-փոշին պակասեցնում է լյարդում վնասակար ճարպերի՝ տրիգլիցերիդների քանակությունը մոտ մեկ երրորդով:
Նախորդ հետազոտություններում գիտնականներն արդեն իսկ նշել էին սև շոկոլադի օգտակար հատկությունները. այն լավացնում է միտքը, նվազեցնում է ախորժակը և զարկերակային ճնշումը:
Իրենց նոր հետազոտության մեջ Վիրջինիայի Պոլիտեխնիկական ինստիտուտի մասնագետների խումբը բացահայտել է, որ շոկոլադը հիանալի կանխարգելիչ միջոց է շաքարային դիաբետի դեմ:
Փորձի ընթացքում գիտնականները կերակրում էին մկների խմբերը տարբեր մթերքներով, այդ թվում՝ ճարպերի բարձր և ցածր պարունակությամբ: Երկրորդ խմբի մկների սննդակարգում գիտնականներն ավելացրել էին ֆլավոնոիդների տարբեր տեսակներ՝ մոնոմեր, օլիգոմեր և պոլիմեր:
Հետազոտությունը տևեց 12 շաբաթ: Կրծողները օգտագործում էին օրական 25 մգ ֆլավոնոիդ մեկ կիլոգրամ կշռի հաշվարկով:
Պարզվեց, որ կակաոի մեջ պարունակվող ոչ բոլոր ֆլավոնոիդներն են նպաստում քաշի և երկրորդ տիպի շաքարային դիաբետի զարգացման հավանականության նվազեցմանը: Առավել զգալի ազդեցություն թողեցին միայն օլիգոմեր պրոցիանիդինները:
"Ստացված տվյալները վկայում են այն մասին, որ կակաոյի կամ կակաո-փոշու մեջ պարունակվող ֆլավոնոիդների չափավոր բաժիններն արդյունավետ են մարդու համար",- մեկնաբանում է աշխատանքի առաջատար հեղինակ Էնդրյու Նելսոնը:
Գիտնականները նաև ընդգծում են, որ շոկոլադի ոչ բոլոր տեսակներն են օգտակար: Մթերքի որակի մասին կարելի է դատել' ըստ արտաքին տեսքի: Օգտակար շոկոլադը պետք է լինի հագեցած մուգ շագանակագույն՝ փայլուն մակերեսով: Իսկ եթե սալիկի գույնն ավելի մոտ է սև երանգներին, ապա, ամենայն հավանականությամբ, արտադրության ընթացքում օգտագործվել է ներկանյութ: Սև շոկոլադը ձեռքում չի հալչում, նրա պահպանման ժամկետը 1.5 տարուց ոչ ավել է: