Քննության նպատակը պետք է լինի իմացածը բացահայտել, ոչ թե չիմացածի համար գնահատել

Operativ.am-ը զրուցեց Կրթության ազգային ինստիտուտի փոխտնօրեն, կրթության փորձագետ Անահիտ Բախշյանի հետ՝ շտեմարանների հետ կապված վիճելի հարցերի վերաբերյալ տեղեկատվություն ստանալու համար, քանի որ, ինչպես գիտենք, Բախշյանը կրթության ոլորտի  այն գործիչն է, ում ոչ միայն հուզում է դիմորդների ճակատագիրը, այլև նա օպերատիվ կերպով ձեռնամուխ է լինում  վերջիններիս խնդիրների լուսաբանմանը:

«ԳԹԿ-ի պաշտոնական կայքում հունվարի 18-ին հրապարակված նյութի մեջ գրված է հետևյալը. հայոց լեզվի և գրականության շտեմարաններում տեխնիկական վրիպակների, պատասխանների սխալների, առաջադրանքների պահանջների սխալ ձևակերպումներով ընդամենը 13 առաջադրանք և 23 բառ կա, որոնց պետք չէ ուշադրություն դարձնել, պետք է դրանք համարել հանված, այինքն իրենք խոստովանում են իրենց թույլ տված սխալների մասին,- վրդովված նշեց Բախշյանը:

«Հիմա ես հարց եմ տալիս, եթե որևէ մի երեխա միասնական քննության ժամանակ թեստի մեջ տեխնիկական վրիպակ ունենա կամ սխալ հասկանա առաջադրանքի ձևակերպումը, ի՞նչ կնշանակեք այդ դիմորդին՝ դիմում է ԳԹԿ-ին Բախշյանը,- ձեռքերը կշփեք, կասեք ուխ, վատ կնշանակեք այնպես չէ՞, այսօր մենք՝ հասարակությունն ենք իրենց վատ նշանակում այդ 16 հոգանոց թիմին՝ Մեյթիխանյանի գլխավորությամբ»:

Բախշյանի խոսքով՝  աշակերտները շարունակում են ընդվզել, քանի որ թեստերում դեռ 1000-ից ավելի սխալներ կան:

«ԳԹԿ-ն փակ է գործում, բաց չեն գործում, որպեսզի մենք հասկանանք, թե ինչ են անում»:

Այն հարցին, թե ԳԹԿ-ի քննարկումները, որոնց մասին իրենք են նշում, ի՞նչ կարող են տալ դիմորդներին, քանի որ ժամանակը շատ քիչ է մինչ քննությունները, Բախշյանը պատասխանեց.

-Օգուտը կլինի այն, որ միասնական քննության թեստերում այդ հանելուկային  կամ երեխաների գիտելիքները չբացահայտող առաջադրանքերը գոնե չեն լինի, այդ շտեմարանները և դրանից բխող թեստերը աշակերտների գիտելիքների բացահայտելուն չեն ուղղված, քննության նպատակը պետք է լինի իմացածը բացահայտել, ոչ թե չիմացածի համար գնահատել: