«Իսրայելում նոր կառավարության ձևավորումը կարող է նույնիսկ մի քանի շաբաթ տևել». Արմեն Պետրոսյան
«Ներկայում ընթանում է բուռն և բազմակողմանի բանակցությունների շրջափուլը, որը կարող է նույնիսկ մի քանի շաբաթ տևել, քանի որ ընտրությունների ընթացքում որոշ անակնկալներ գրանցվեցին»,_ այս մասին Operativ.am-ի հետ զրույցում, մեկնաբանելով ընտրություններից հետո Իսրայելում ակնկալվող քաղաքական վերաձևումների հնարավոր տարբերակները, նշեց արևելագետ Արմեն Պետրոսյանը:
«Իսրայելում կայացած խորհրդարանական ընտրությունների արդյունքում հաղթեց վարչապետ Բենյամին Նեթանյահուի և արդեն նախկին ԱԳ նախարար Ավիգդոր Լիբերմանի գլխավորած քաղաքական ուժը՝ աջ-կենտրոնամետ ուղղվածության «Լիկուդ-Բեյտենու» դաշինքը: Սակայն այդ հաղթանակը բավականաչափ համոզիչ չէր, քանի որ դաշինքն ստացավ ընտրողների՝ սպասվածից շատ ավելի սակավ քանակությամբ քվեներ, ինչը բավականին բարդ դրության մեջ է դրել գործող վարչապետին՝ կոալիցիայի ձևավորման նպատակով մեկնարկած բանակցություններում: Դատելով ընտրությունների արդյունքներից՝ ուժերի հարաբերակցությունը գրեթե հավասար է, թերևս չնչին առավելություն ունեն աջերը:
Սակայն Նեթանյահուի արդենիսկ ձեռնարկած մի շարք գործողություններ թույլ են տալիս ենթադրել, որ վերջինս ձգտում է ձևավորել առավել ընդլայնված կոալիցիոն կառավարություն՝ դրանում ներգրավելով նաև անակնկալ կերպով երկրորդ տեղը զբաղեցրած քաղաքական ուժին՝ նախկին լրագրող Յաիր Լապիդի գլխավորած կենտրոնամետ «Յեշ Ատիդ» (Կա ապագա) կուսակցությանը, որը ստացել է ընտրողների քվեների բավականին պատկառելի քանակություն և Կնեսետում կունենա 19 մանդատ: Սակայն բանակցություններն ընթանում են բավականին լարված պայմաններում, քանի որ առնվազն երեք առանցքային հիմնակետերի շուրջ՝ ուղղափառ կրոնական երիտասարդներին զորակոչելու, նախարարությունների թվի կրճատման, ինչպես նաև պաղեսինաիսրայելյան խաղաղ կարգավորման գործընթացը վերսկսելու հարցերում, առկա են սկզբունքային տարաձայնություններ:
Այնուամենայնիվ, թեժ բանակցություններն ու սակարկությունները դեռ շարունակվում են, բայց արդենիսկ կարելի է հավաստել, որ Իսրայել պետության նոր գործադիր մարմինը ամենայն հավանականությամբ կունենա կամ աջ-կենտրոնամետ, ուղղվածություն կամ էլ, ինչը ևս, կարծում եմ՝ չի կարելի բացառել հատկապես Նեթանյահու-Լապիդ բանակցությունների ձախողման դեպքում, կձևավորվի այդ երկրի պատմության ողջ ընթացքում ամենածայրահեղ աջ, ազգային-պահպանողական ուղղվածության կառավարությունը, ինչն էլ բնականաբար իր ուղղակի ազդեցությունը կունենա առաջիկա տարիներին Թել Ավիվի ներքին և արտաքին քաղաքական ուղեգծերի վրա»,_ նշեց Արմեն Պետրոսյանը: