Ջուսի անհավանական արկածները «Ձմեռ պապի» կերպարում

Նոր տարվան ընդառաջ Operativ.am-ի թղթակիցը զրուցեց երգչուհի Ջուսի հետ՝ վերջինիս ամանորյա երազանքների, Ձմեռ պապից խնդրած նվերների և այն մասին, թե արդյո՞ք Ջուսը երբևէ եղել է Ձյունանուշի դերում: Հատկապես վերջին հարցը տալու ժամանակ ստացանք շատ տարօրինակ պատասխան:

-Որտե՞ղ և ո՞ւմ հետ է Ջուսը դիմավորելու Նոր տարին:

-Ես սիրում եմ գործի մեջ դիմավորել Նոր տարին, այսինքն՝ երգելով, համերգներ տալով, ակումբներում: Ինձ մոտ Նոր տարին այդպես է անցնում մինչև առավոտյան ժամը 5:00-ը: Ելույթներ եմ ունենում մի քանի տեղ: Ես դա նախընտրում եմ ավելի, քան տանն անցկացնելը, քանի որ շատ ուրախ է անցնում: Նաև փող ես աշխատում: Եթե երեխաներ և ամուսին ունենայի, այդ ժամանակ երևի կուզեի տանը նշել, բայց հիմա սիրում եմ շատ մարդկանց շրջապատում՝ համերգներ տալով, կատակներ անելով:

-Ձյունանուշի կերպարում Ջուսը երբևէ եղե՞լ է:

-Ձյունանուշի չէ, բայց Ձմեռ պապի կերպարում եղել եմ: Ու շատ լավն էի, մորուքս շատ սազում էր: Դա եղել է «Բնական Juice» հաղորդման շրջանակներում: Ինձ հագցրել էին Ձմեռ պապի շորեր, մորուք: Իսկական Ձմեռ պապ էի: Վերցրել էի նվերները և մեր հայտնիների տներն էի գնում. Ալլա Լևոնյանի, Զարուհի Բաբայանի, Լուիզա Ներսիսյանի, Ռազմիկ Ամյանի: Իրենց երեխաները շատ փոքր էին, ու ես հաստ ձայնով ասում էի «Բարև Ձեզ», ու այդ ամենը նկարվում էր: Երեխեքն ասում էին. «Դա Ձմեռ պապ չի, դա Ջուսն ա»: Մորուքիցս հասկացան: Ես էլ ասացի Ջուս-Ձմեռ պապիկը եկել է ձեզ մոտ: Շատ լավ անցավ: Դրանից հետ ինձ միշտ Ձմեռ պապի շորեր էին ուզում հագցնել, որ Ձմեռ պապ դառնայի, բայց հրաժարվում էի:

-Ամենասպասված նվերը, որ ստացել եք Նոր տարուն:

-Չեմ կարող հիշել: Ես իմ ամենալավ նվերները ստանում եմ իմ ծնունդին: Նոր տարուն միշտ լինում են փողեր: Ամենասպասված նվերը Նոր տարուն ինձ համար համերգներն են: Բոլորի մոտ է այդպես, բոլոր արտիստները դրան են սպասում՝ ինչքան համերգներ կլինեն այդ օրը:

-Փոքր տարիքում Ջուսը Ձմեռ պապին նամակ գրե՞լ է:

-Նամակ, կարծեմ չեմ գրել, բայց միշտ գալիս էր մեր տուն, մամաս վարձում էր Ձմեռ պապիկ: Ձմեռ պապը գալիս էր, ես երկար արտասանում էի: Մի անգամ էլ ռուսական բանաստեղծություներ երկա՜ր արտասանեցի, որ Ձմեռ պապն ասում էր. «Մերսի, հերիք ա»: Ես ասում էի՝ չէ, չի վերջացել: Այդպես՝ երկու ժամ արտասանելուց հետո, Ձմեռ պապը նվերս տվեց: Հիմա, ցավոք, ոչ բոլոր երեխաներն են հավատում Ձմեռ պապին, որովհետև օրեր առաջ մեր հարազատներից մեկի տանն էի, որտեղ կա 8-9 տարեկան երեխա, և ինքը ասաց. «Մամ, բա Ձմեռ պապուն չես կանչո՞ւմ, փող տուր, թող գա, ինձ նվեր բերի»:

-Ի՞նչ կմաղթեք ընթերցողներին:

-Այս տարի բոլորին մաղթում եմ շատ ԱՓՍԵ, այսինքն՝ Առողջություն, Փող, Սեր, Երջանկություն:

Զրուցեց Աստղիկ Հովհաննիսյանը