Հին նոր տարվա անվան տակ «Բելաջիոյում» ԵՊՀ ռեկտորի որդու ծնվելն են նշել․ «Հրապարակ»

«Հրապարակ» թերթը գրում է. ԵՊՀ ռեկտոր՝ ՔՊ-ական Հովհաննես Հովհաննիսյանը նախորդ ամիս երրորդ որդին է ունեցել եւ որոշել է յոթ օր-յոթ գիշեր քեֆ անել։ Նա նախ իր ընկերական շրջապատին է հրավիրել Ջրվեժում գտնվող «Հին Ջրվեժ» ռեստորան, որտեղ, բացի ընկերներից, ներկա են եղել նաեւ ԵՊՀ-ի մի քանի դեկաններ եւ վարչական ստորաբաժանումների ղեկավարներ, իսկ դրանից մի քանի օր անց՝ հունվարի 13-ին էլ, երկրորդ մեծ կերուխումն է կազմակերպել` «Բելաջիո» ռեստորանային համալիրում: Բայց մեր հնարամիտ ռեկտորը դա իրականացրել է բուհի ֆինանսական միջոցների հաշվին` դա փաթեթավորելով «հին Նոր տարին» նշելու տակ: Այս խնջույքին էլ մասնակցել են համալսարանի պրոռեկտորները, մի քանի դեկան եւ մի քանի վարչական ստորաբաժանումների ղեկավար։ Մեզ ասացին, որ դեկաններից մի քանիսը, տեղեկանալով, որ «Բելաջիոյում» Հովհաննիսյանի երրորդ որդու երկրորդ խնջույքն է կազմակերպվել, ուղղակի չեն գնացել քեֆին:

Չեն մասնակցել, մասնավորապես, Իրավագիտության ֆակուլտետի դեկան Գագիկ Ղազինյանը, Մաթեմատիկայի եւ մեխանիկայի ֆակուլտետի դեկան Արթուր Սահակյանը, Տնտեսագիտության եւ կառավարման ֆակուլտետի դեկան Կարլեն Խաչատրյանը: Փոխարենը` որոշ դեկաններ միանգամից երկու խնջույքին են մասնակցել:

Բայց համալսարանում խուլ դժգոհություն է առաջացել, քանի որ սա չլսված դեպք է համալսարանի պատմության մեջ, որ ռեկտորը բուհի հաշվին որդու ծնվելու աչքալուսանքը կազմակերպի` այն անվանելով «հին Նոր տարի»։ Համալսարանականները հարցնում են` եթե «հին Նոր տարի» էին նշում, ինչո՞ւ մեզ չեն հրավիրել, այլ հրավիրել են միայն պրոռեկտորներին եւ դեկաններին, չէ՞ որ համալսարանում կան ամբիոնի վարիչներ, պրոֆեսորներ, ակադեմիկոսներ, վարչության ու բաժնի պետեր եւ, ընդհանրապես՝ աշխատողներ: Ի դեպ, «հին Նոր տարին» նշողներից մեկը մեզ հետ զրույցում հաստատեց, որ միջոցառման ընթացքում գերակշռել են ռեկտորի երրորդ որդու լույս աշխարհ գալուն նվիրված կենացները։ Համալսարանական մեր աղբյուրը հավաստիացրեց նաեւ, որ այդ միջոցառման գնումը կատարվել է ոչ թե մրցույթով այլ մեկ անձից գնման միջոցով։

Մենք ԵՊՀ հարցում ուղարկեցինք՝ որքան գումար է ծախսվել, այսպես կոչված, «հին Նոր տարին» նշելու համար, եւ քանի մարդ է մասնակցել: Պարզվեց` մոտ 3 հազար դոլար:

«Հին տոմարով Նոր տարին աշխատակիցների մասնակցությամբ տոնելու ԵՊՀ-ում ձեւավորված երկարամյա ավանդույթի համաձայն՝ այս տարի եւս կազմակերպվել է կորպորատիվ միջոցառում, որին մասնակցել են ԵՊՀ ռեկտորատի ներկայացուցիչներ, ֆակուլտետների ու ինստիտուտների, ինչպես նաեւ կառուցվածքային այլ ստորաբաժանումների ղեկավարներ։ Միջոցառման անցկացման համար հատկացվել է 1 մլն 128 հազար 950 դրամ»,- մեզ պատասխանեց ԵՊՀ խոսնակը: Տեղեկացանք նաեւ, որ նշված միջոցառմանը շուրջ 40 մարդ է մասնակցել։
Կապ հաստատեցինք նաեւ Մաթեմատիկայի ֆակուլտետի դեկան Արթուր Սահակյանի հետ, ով ասաց, թե նախօրոք պլանավորված այլ միջոցառման պատճառով չի մասնակցել հունվարի 13-ի հավաքին, իսկ ռեկտորի որդու ծնվելու մասին իմացել է ավելի ուշ։ Մեկ այլ աշխատակից, ով երկար տարիներ աշխատում է ԵՊՀ-ում, պնդեց, որ երբեք ԵՊՀ-ում հին Նոր տարին չեն նշել, գոնե վերջին 10-15 տարիների կտրվածքով ռեստորանում նշելու դեպք ինքը չի հիշում:

Առավել մանրամասն թերթի այսօրվա համարում: