ԲՀԿ-ականները դեռևս չե՞ն կողմնորոշվում. սատարեն գործող նախագահին, թե ոչ
Operativ.am-ի հետ զրույցում ԲՀԿ խմբակցության խոսնակ Տիգրան Ուրիխանյանը չհերքեց մամուլում արծարծվող այն լուրը, որ Գյումրիի թիվ 34 ընտրատարածքի ԲՀԿ-ական պատասխանատու Մարտուն Գրիգորյանը, ով ԱԺ գյուղատնտեսության և բնապահպանության հարցերի հանձնաժողովի նախագահն է, աջակցելու է գործող նախագահին:
«Ես զրուցեցի Մարտուն Գրիգորյանի հետ, ինչպես և սպասվում էր ստացա համապատասխան պատասխան, նա չի հայտարարել Սերժ Սարգսյանին սատարելու մասին, նա հայտարարել է, որ ենթարկվում է կուսակցության որոշմանը և պարզապես որպես անհատ՝ ինքը ընտրությունների ժամանակ ընտրելու է գործող նախագահին, խոսքը գնում է միայն ընտրություն կատարելու մասին»:
Այն հարցին, թե արդյոք ԲՀԿ-ականների կողմից սպասվու՞մ են նման անհատական որոշումներ, խոսնակը չցանկացավ խոսել ենթադրությունների մասին, առավել ևս, որ լինեն, թե չլինեն՝ դա իրեն չի հետաքրքրում, քանի որ կուսակցության պաշտոնական որոշումը բոլորին հայտնի է:
«Ինչ վերաբերում է անհատներին, նրանք իրավունք ունեն կատարել իրենց քաղաքացիական պարտքը՝ իրենց համար նախընտրելի տարբերակով»,- նշեց Ուրիխանյանը:
Մամուլում շրջանառվող լուրերի համաձայն՝ Աբովյանի քաղաքապետ Կարապետ Գուլոյանը նույնպես աջակցելու է գործող նախագահին, հարցի առնչությամբ խոսնակը նշեց.
«Եթե փաստի առնչությամբ որևէ իրադարձություն կլինի, ես պատրաստ եմ խոսել այդ մասին և մեկնաբանել, քանի որ փաստացի իրադարձություն չկա, մեկնաբանություններն ավելորդ են»: