Operativ.am-ի բացառիկ հարցազրույցը Հրանտ Բագրատյանի հետ
Operativ.am-ը զրուցեց ՀՀ նախագահի թեկնածու, «Ազատություն» կուսակցության ղեկավար, ՀՀ նախկին վարչապետ Հրանտ Բագրատյանի հետ:
Պարոն Բագրատյան, Ձեր գրառումներից մեկում նշել եք՝ համաշխարհային ճգնաժամը մնացել է հանրապետության հրապարակում՝ կառավարության շենքում, ի՞նչ եք կարծում Ձեր՝ նախագահ ընտրվելու դեպքում, համաշխարհային ճգնաժամը ինչքա՞ն ժամանակում կհեռանա երկրից:
-Անմիջապես հենց որ կառավարությունը հասկանա, որ
1. պետք է խրախուսել սպառումը և սպառման կորը,
2.դանդաղ, բայց հաստատուն կերպով, մի փոքր արժեզրկել դրամը,
3. ստերիլիզացնել տրասֆերտները,
4. վերջ տալ մենաշնորհներին. տնտեսությունը կսկսի արագորեն աշխուժանալ;
Այդ չորս աասկզբունքային կետերը բավարարելու համար բավական է երեք ամիս:
Քաղաքագետներից մեկի բնութագրմամբ՝ Ձեզ խանգարում է Ձեր անցյալը, քանի որ որպես վարչապետ շատ թույլ եք եղել, «Կարծում եմ Հրանտ Բագրատյանին մեծամասամբ կընտրեն Երևանի բուհերի ակտիվ ուսանողները, որոնք շատ քիչ են հիշում նրա կառավարման տարիները, և երևի թե այն անձինք, որոնք Հրանտ Բագրատյանին դարձրել են կուռք»,-նշել է նա, ի՞նչ կասեք այս մասին, արդյոք Ձեր ընտրազանգվածում Դուք միա՞յն երիտասարդներին եք տեսնում:
-Դուք այդ մի քաղաքագետին եք լսել, կան տասը քաղաքագետներ, որոնք ճիշտ հակառակն են ասում: Այս երկրի բոլոր կարևոր բարեփոխումները նախաձեռնել եմ ինքս: Առաջին տնտեսական աճը ստացել եմ ես. 1,5-2 տարի քրտնաջան աշխատելուց հետո ապահովել եմ 24-ժամյա հոսանքով: Նախաձեռնել եմ սեփականաշնորհումը հողի և մանր օբյեկտների և, վերջապես, իմ օրոք տեղի ունեցան ամենակարևոր իրադարձությունները պատերազմում՝ Արցախյան ազատամարտի մի շարք հաղթանակներ: Որակումների մասին ինքներդ մտածեք:
Պարոն Բագրատյան, նման միտք եք արտահայտել, թե նախագահ դառնալու դեպքում եկեղեցին հարկային դաշտ եք մտցնելու, Կոմիտաս վարդապետը նշել է՝ եթե ինչ-որ հայ կարծում է, որ մոմավառության գործընթացը շահույթ ապահովող գործունեություն է, ապա նա զրոյական պատկերացում ունի իր եկեղեցու մասին, իսկ այն հայը, ով զրոյական պատկերացում ունի եկեղեցու մասին, զրոյական արժեք ունի իր՝ Կոմիտաս վարդապետի համար։
Ձեզ համար միևնու՞յն է, թե ինչ կարծիք ունեն Ձեր մասին հոգևորականները:
-Բացարձակ տրամաբանություն չկա, որովհետև ասված է, որ եկեղեցու կոմերցիոն գործունեությունը պետք է հարկվի, մոմավառության մասին խոսք չի եղել: Նման կարգի հարց-պատասխան տալուց առաջ, պետք է նախեւառաջ կարդալ, ով ինչ է ասել: Կոմիտաս վարդապետին էլ հանգիստ թողեք:
Ձեզ համար սկզբունքային հարց է նախագահական ընտրություններում հաղթելը, թե՞գործող նախագահին իր պաշտոնում չտեսնելը: Քանի որ ինչպես Դուք եք նշել՝գործող նախագահի դիրքերն ավելի ամուր են, քան մեր երկրի դիրքերը:
-Ես առաջադրվել եմ նախագահական ընտրություններում միմիայն հաղթելու համար:
Ըստ Ձեզ' ո՞րն է Ձեր առավելությունը գործող նախագահի նկատմամբ:
-Ես հիանալի պատկերացնում եմ, թե ինչ պետք է անել մեր երկրում և առաջ եմ քաշում գործունեության այլ մոդել: Պնդում եմ, որ այսօր հրապարակում կա գործունեության երկու ծրագիր. մեկը գործող իշխանությանն է, մյուսը իմն է՝ նկատի ունեմ «100 քայլը»: Սակայն կասկած չունեմ, որ իշխանության ծրագրում չկա հաջողության երաշխիք, իմծ րագրում դա կա. ես ցույց եմ տալիս ինչպես պետք է խնայել, ներդնել, ապահովել բյուջեի եկամուտները և բարձր մակարդակով լուծել սոցիալական հարցերը: Գործող նախագահի ծրագրում ես դրանք չեմ տեսել: Ի դեպ, վերջին մի քանի տարիներին արված կառավարության հազվադեպ ճիշտ քայլերը, հայտարարում եմ ամենայն պատասխանատվությամբ՝վերցված են իմ ծրագրից:
Ինձ հետ նախորդ հարցազրույցում նշեցիք, որ իշխանությունները ըստ Ձեր հաշարկների' կարող են բաժանել 80-250 միլիոն և նշեցիք, որ դա ձեռնտու է, քանի որ տնտեսական աճ կնկատվի, այժմ է՞լ եք այդ տեսակետին համամիտ:
-Այս պահի դրությամբ մեզ այդ փաստերը դեռ հայտնի չեն:
Անկախ ընտրությունների արդյունքից' կրկին կանդրադառնա՞ք նվազագույն աշխատավարձի' Ձեր հեղինակած նախագծին:
-Անպայման: Կընտրվեմ, նվազագույն աշխատավարձը կդարձնեմ 72 500 դրամ:
Ձեր՝ Նախագահ ընտրվելու դեպքում ո՞վ է բարձրաձայնելու բյուջեում չհաշվառված գումարների մասին:
-Վարչապետն ու ֆինանսների նախարարը:
Հայաստանյան հեռավոր գյուղի բնակչին, ում համար խիստ միևնույն է, թե ով է առաջադրվել և ով ինչ ծրագիր ունի, մարդ, ով հուսախաբ է եղել իշխանություններից էլ, ընդդիմությունից էլ, ի՞նչ կասեք այդ մարդուն. ի՞նչ սպասելիքներ ունենա վերջինս ՀՀ նախագահի թեկնածու Հրանտ Բագրատյանից:
-Ես չեմ կիսում Ձեր կարծիքը հայաստանյան հեռավոր բնակչի մասին: Ընտրություններին մասնակցելը, թեկնածուների ծրագրերով հետաքրքրվելը, կարևոր աշխատանք է յուրաքանչյուր քաղաքացու համար: Սրանում հեշտությամբ կհամոզվեք, եթե այցելեք որևէ հեռավոր գյուղ:
Հեղինակ՝ Սեդա Ղուկասյան