Վարչապետին ենթակա նոր հետախուզական մարմին կստեղծվի

Ազգային անվտանգության ծառայությունը երեկ շրջանառության մեջ է դրել արտաքին հետախուզության առանձին մարմին ստեղծելու վերաբերյալ օրենքի նախագիծ։ Օրենքի նախագիծը կոչվում է « Արտաքին հետախուզական գործունեության և արտաքին հետախուզության ծառայության մասին»։

Օրենքի նախագծի 4-րդ հոդվածի առաջին մասում, որը վերաբերում արտաքին հետախուզում իրականացնող լիազոր մարմնին, ասվում է․

«Արտաքին հետախուզական գործունեություն իրականացնող մարմինների համակարգը բաղկացած է Հայաստանի Հանրապետության արտաքին հետախուզության բնագավառի պետական կառավարման լիազորված մարմնից՝ Ծառայությունից՝ կենտրոնական և մարզային կառուցվածքային ստորաբաժանումներից, հատուկ նշանակության և այլ ստորաբաժանումներից, ինչպես նաև արտաքին հետախուզական գործունեություն իրականացնող այլ մարմիններից (պետական կառավարման համակարգի մարմիններում արտաքին հետախուզական գործունեություն իրականացնող ստորաբաժանումներից)»,- ասված է օրենքի նախագծում։ Այսինքն՝ արտաքին հետախուզության նոր մարմինը կկոչվի «Արտաքին հետախուզության ծառայություն»։ 

Օրենքի նախագծի 11-րդ հոդվածը սահմանում է, թե պետական որ մարմիննեն ունեն արտաքին հետախուզական գործունեություն ծավալելու իրավունք։ Օրենքի 1-ին մասը սահմանում է․
« 1. Օրենքով իրենց վերապահված լիազորությունների շրջանակներում արտաքին հետախուզական գործունեություն իրականացնելու իրավունք ունեն՝
1) Ծառայությունը.
2) պաշտպանության բնագավառի պետական լիազոր մարմնի հետախուզության ստորաբաժանումը՝ ռազմական, ռազմաքաղաքական, ռազմատեխնիկական և ռազմա-տնտեսական ոլորտներում.
3) Ազգային անվտանգության ծառայության հետախուզության ստորաբաժանումը:
2. Սույն հոդվածի 1-ին մասի 2-րդ և 3-րդ կետերով նախատեսված արտաքին հետախուզական գործունեություն իրականացնող մարմիններին վերապահվում են սույն օրենքով Ծառայությանը վերապահված լիազորությունները՝ վերաբերող մասով:
3. Արտաքին հետախուզական գործունեություն իրականացնող մարմինները ֆինանսավորվում են Հայաստանի Հանրապետության պետական բյուջեի միջոցներից»։ 

Օրենքի նախագծի հոդված 15-ը սահմանում է, որ ստեղծվելիք նոր ծառայությունը ենթակա է վարչապետին․

«Ծառայությունը «Պետական կառավարման համակարգի մարմինների մասին» Հայաստանի Հանրապետության օրենքով սահմանված արտաքին հետախուզության ոլորտում գործող Վարչապետին ենթակա մարմին է, որն իրականացնում է սույն օրենքով և մյուս համապատասխան իրավական ակտերով իրեն վերապահված լիազորություններ:
2. Ծառայությունում ծառայությունը պետական ծառայության տեսակ է, որի առանձնահատկությունները սահմանվում են սույն օրենքով, այլ օրենքներով և իրավական ակտերով:
3. Ծառայությունը բաղկացած է կենտրոնական և մարզային կառուցվածքային ստորաբաժանումներից, ուսումնական կենտրոններից, հատուկ և այլ ստորաբաժանումներից»։ Հոդված 19-ն էլ  սահմանում է, որ ծառայության պետը անմիջականորեն ենթակա և հաշվետու է վարչապետին։