Հանրային կապերի և տեղեկատվության կենտրոնի պատասխանը «Հրապարակ» օրաթերթին
«Հրապարակ» օրաթերթի գլխավոր խմբագիր
Արմինե Օհանյանին
ՀՀ վարչապետի աշխատակազմի
«Հանրային կապերի և տեղեկատվության կենտրոն» ՊՈԱԿ-ի տնօրեն
Գոռ Ծառուկյանից
Հարգելի տիկին Օհանյան,
Ձեր կողմից ղեկավարվող Hraparak.am լրատվական կայքում (08.09.22-ին) և «Հրապարակ» օրաթերթում (09.09.22-ին լույս տեսած համարում) հրապարակվել է ««ՖԵՅՔԵՐԻ» ՊՈԱԿ-Ի ՖԻՆԱՆՍԱՎՈՐՈՒՄԸ ՀԱՍԱՎ 500 ՄԻԼԻՈՆԻ» վերնագրով նյութը, որտեղ ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի (այսուհետ` Կենտրոն) վերաբերյալ ի թիվս պիտակավորումների և ոչ կոռեկտ ձևակերպումների տեղ են գտել կեղծ տեղեկատվություն և իրականությանը չհամապատասխանող պնդումներ։
Մեջբերում տվյալ նյութից. «...միակ տեսանելի բանը, որ անում է (ՀԿՏԿ ՊՈԱԿ-ը, Գ.Ծ.)՝ սոցկայքերում կեղծ օգտահաշիվներ է բացում եւ սպասարկում՝ ապահովելով իշխանության գովքը, քարոզն ու հայհոյում բոլորին, ով իշխանության հետ համակարծիք չէ»:
Հրապարակման առնչությամբ հայտնում եմ, որ Կենտրոնում աշխատող որևէ աշխատակից երբևէ չի ստացել և առավել ևս` իրականացրել նման հանձնարարություններ ու չի զբաղվում վերոնշյալ արատավոր գործունեությամբ, նկարագրված գործելաոճն անընդունելի և դատապարտելի է ոչ միայն իմ՝ որպես տնօրենի, այլև Կենտրոնի աշխատակիցների համար։ Հետևաբար հիշատակված նյութում ներկայացված տեղեկատվությունն ամբողջովին կեղծ է ու չի համապատասխանում իրականությանը։
Բացի այդ, տեղեկացնում եմ, որ Կենտրոնն իրականացնում է բազմաթիվ աշխատանքներ ու կարևոր գործառույթներ, որոնք թափանցիկ և ՏԵՍԱՆԵԼԻ են ՀՀ քաղաքացիների, առավել ևս` լրատվամիջոցների համար։ Թվեմ դրանցից մի քանիսը.
• Կենտրոնն իրականացնում է ՀՀ կառավարության նիստերի, փոխվարչապետերի, վարչապետի աշխատակազմի ղեկավարի գլխավորությամբ անցկացված պաշտոնական հանդիպումների, խորհրդակցությունների արարողակարգային նկարահանումը, լուսանկարահանումը, մոնտաժը, տարածումը։
• Կենտրոնն իրականացնում է «Հրապարակում» հաղորդման, «Մեր ժամանակների հերոսը» հաղորդաշարի, «Արձակուրդը Հայաստանում», «Ընտրի՛ր հայկականը» նախագծերի նկարահանումը, հանդիսանում է «Մեր ժամանակների հերոսը» ամենամյա համերգ-մրցանակաբաշխության կազմակերպման պատասխանատու ստորաբաժանումը։
• Կենտրոնը վարում է սոցիալական ցանցերում ՀՀ կառավարության պաշտոնական հարթակները՝ մշակելով հրապարակումների բովանդակությունը (Ֆեյսբուք, Յութուբ, Տելեգրամ, Ինստագրամ, Թվիթեր): Պատրաստվում և տարածվում են կառավարության որոշումների, ծրագրերի և միջոցառումների, դրանց արդյունքների վերաբերյալ իրազեկող ֆոտոշարքեր, ինֆոգրաֆիկաներ, անիմացիոն հոլովակներ։
• Կենտրոնը վարում է մի շարք լրատվական հարթակներ, որոնք օտար լեզուներով հակազդում են հակահայկական քարոզչությանը, արտաքին լսարանին ներկայացնում են Հայաստանի պաշտոնական դիրքորոշումները։
• Կենտրոնն իրականացնում է փաստագրման և արխիվացման աշխատանքներ՝ կապված հայ-ադրբեջանական հակամարտության դրսևորումների, մարդու իրավունքների և միջազգային իրավունքի խախտումների արձանագրման հետ։ Փաստագրված նյութերի հիման վրա իրականացվում է խորհրդատվություն պետական գերատեսչությունների հետ։ Պատրաստվում են փաստագրական ֆիլմեր, հոդվածներ և այլ նյութեր, որոնք հասանելի են համացանցում։
• Կենտրոնի ներքո գործում է «Օրբելի» վերլուծական կենտրոնը որի շրջանակներում փորձագիտական մակարդակով համագործակցություն է ծավալվում ռուսական, եվրոպական, տարածաշրջանային (Իրան, Վրաստան) փորձագիտական կենտրոնների հետ։
• Կենտրոնը ճգնաժամային իրավիճակներում իրականացնում է պաշտոնական տեղեկատվության մշակման ու տարածման միջոցառումներ։ Վերջին տարիներին համաճարակային իրավիճակով պայմանավորված իրականացվում է հակահամաճարակային կանոնների, պատվաստումների խթանման և կորոնավիրուսի հետևանքների հաղթահարման միջոցառումների վերաբերյալ ֆիլմերի, հոլովակների, ինֆոգրաֆիկաների և այլ հանրամատչելի նյութերի պատրաստում ու տարածում։
• Բացի այդ, իրականացվում է ռուսերեն, անգլերեն, ադրբեջաներեն, թուրքերեն, պարսկերեն, արաբերեն, վրացերեն լեզուներով տարածաշրջանային և միջազգային լրատվամիջոցների օպերատիվ մշտադիտարկում, տեղեկանքների և զեկույցների պատրաստում, զեկուցում համապատասխան գերատեսչություններին և պաշտոնյաներին (աշխատանքի այս մասը մեծ մասամբ հրապարակային չէ)։
Այս և բազմաթիվ այլ գործառույթներ, որոնց թվարկումն անհարկի կերկարացնի սույն նամակի ծավալը, գերակշիռ մասով տեսանելի են հանրության և հատկապես լրատվամիջոցների համար։ Հետևաբար Ձեր ղեկավարած լրատվամիջոցը ոչ միայն տարածում է սուտ տեղեկատվություն՝ զրպարտելով և Կենտրոնին վերագրելով իրականությանը չհամապատասխանող արատավոր երևույթներ, այլ նաև կատարում է կեղծ պնդում` Կենտրոնի կողմից կատարվող տեսանելի աշխատանքների մասով։
Հաշվի առնելով վերոգրյալը, «Զանգվածային լրատվության մասին» ՀՀ օրենքի 8-րդ հոդվածի դրույթների համաձայն՝ հետևողականորեն պահանջում եմ Hraparak.am լրատվական կայքում և «Հրապարակ» օրաթերթում հրապարակել հերքում վերոնշյալ մեջբերված ձևակերպումների առնչությամբ և հրապարակել Կենտրոնի պատասխանը, որն ուղարկում եմ կից։
Հ.Գ.
Հարգելի տիկին Օհանյան, որպես լրատվական դաշտի գործընկեր` խնդրում եմ Ձեր կողմից ղեկավարվող լրատվամիջոցում թույլ չտալ «Հանրային կապերի և տեղեկատվության կենտրոն» ՊՈԱԿ-ի վերաբերյալ պիտակավորումների կիրառում («Ֆեյքերի» ՊՈԱԿ, «Ֆեյքերի ֆաբրիկա» և այլն) ու կեղծ տեղեկատվության տեսքով զրպարտության շրջանառում, ինչն արատավորում է պետական կառույցի հեղինակությունը, խաթարում է վստահությունը պետական ինստիտուտի նկատմամբ և բարոյական վնաս է հասցնում կառույցի տնօրինությանն ու անձնակազմին։
Հարգանքով`
Գոռ Ծառուկյան
ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի պատասխանը «Հրապարակ» օրաթերթի՝ ««ՖԵՅՔԵՐԻ» ՊՈԱԿ-Ի ՖԻՆԱՆՍԱՎՈՐՈՒՄԸ ՀԱՍԱՎ 500 ՄԻԼԻՈՆԻ» վերնագրով նյութի առնչությամբ
Hraparak.am լրատվական կայքում (08.09.22) և «Հրապարակ» օրաթերթում (09.09.22) հրապարակված ««ՖԵՅՔԵՐԻ» ՊՈԱԿ-Ի ՖԻՆԱՆՍԱՎՈՐՈՒՄԸ ՀԱՍԱՎ 500 ՄԻԼԻՈՆԻ» վերնագրով նյութում տեղ են գտել կեղծ, զրպարտող բնույթի տեղեկություններ կապված «Հանրային կապերի և տեղեկատվության կենտրոն» ՊՈԱԿ-ի գործունեության վերաբերյալ։ Մասնավորապես, կառույցի մասին նյութում տեղ գտած հետևյալ միտքն ամբողջությամբ սուտ է և զրպարտություն, մեջբերում. «…միակ տեսանելի բանը, որ անում է՝ սոցկայքերում կեղծ օգտահաշիվներ է բացում եւ սպասարկում՝ ապահովելով իշխանության գովքը, քարոզն ու հայհոյում բոլորին, ով իշխանության հետ համակարծիք չէ», մեջբերման ավարտը։
Հայտնում ենք, որ Կենտրոնում աշխատող որևէ աշխատակից երբևէ չի ստացել և առավել ևս` իրականացրել նման հանձնարարություններ ու չի զբաղվում վերոնշյալ արատավոր գործունեությամբ, նկարագրված գործելաոճն անընդունելի և դատապարտելի է կառույցի տնօրինության և աշխատակիցների համար։ Կենտրոնն իրականացնում է բազմաթիվ աշխատանքներ ու կարևոր գործառույթներ, որոնք թափանցիկ և տեսանելի են ՀՀ քաղաքացիների, առավել ևս` լրատվամիջոցների համար։
Տնօրեն ԳՈՌ ԾԱՌՈՒԿՅԱՆ