ԱԺ-ում քաղաքական ու իրավական ճգնաժամ է, շուտով կլինի նաև սահմանադրական ճգնաժամ. Ղազարյան
Վաղը Ազգային ժողովի ՔՊ խմբակցությունը նախաձեռնել է ընդդիմադիր 2 խմբակցությունների բոլոր պատգամավորներին մանդատներից զրկելու հարցով ՍԴ դիմելու վերաբերյալ ԱԺ խորհրդի նիստ, իսկ հաջորդ օրը՝ հունիսի 15-ին, հավանաբար կհրավիրվի արտահերթ նիստ՝ վերոնշյալ հարցը քննարկելու նպատակով։
Թեմայի վերաբերյալ ArmDaily.am-ը զրուցել է Սահմանադրական դատարանի աշխատակազմի նախկին ղեկավար Էդգար Ղազարյանի հետ։
Ղազարյանի արձանագրմամբ՝ նման երևույթ Հայաստանի պատմության մեջ առաջին անգամ է տեղի ունենում։
«Երբևէ ԱԺ-ն չի դիմել ՍԴ՝ պատգամավորներին մանդատներից զրկելու համար, առավել ևս, եթե դա անում է իշխանական մեկ խմբակցություն ու իրականացնում է ընդդիմադիր բոլոր պատգամավորի նկատմամբ։ Ակնհայտ է, որ սա քաղաքական ենթատեքստ ունի ու պայմանավորված չէ ԱԺ-ի բնականոն գործունեության հետ։ Ընդ որում, սա անում է մի խմբակցությունը, որը մեղադրում է ընդդիմադիր պատգամավորներին՝ նիստերը բոյկոտելու համար, այն դեպքում, որ իրենք իրենց հերթին են բոյկոտում խորհրդարանի գործունեությունը։ Բոլոր այն դեպքերում, երբ ընդդիմադիրներն ԱԺ-ում քննարկման են ներկայացրել օրենսդրական նախագծեր, ՔՊ-ի որոշմամբ դրանք նույնիսկ չեն մտել ԱԺ օրակարգ։ Իշխանական ոչ մի պատգամավոր մինչ օրս ընդդիմադիր պատգամավորների կողմից հրավիրված որևէ խորհրդարանական լսումի չի մասնակցել։ Դուրս է գալիս, որ իրենք են բոյկոտում խորհրդարանի աշխատանքը, քանի որ խորհրդարանի գործունեությունը պատկերացնում են միայն իրենց օրակարագով»,- ընդգծեց Ղազարյանը։
Մեր զրուցակցի խոսքով՝ ԱԺ կանոնակարգ օրենքով պատգամավորների աշխատանքը ռեգլամենտավորված չէ. «Պատգամավորի աշխատանքը հստակ կանոնակարգված չէ աշխատանքային, ոչ աշխատանքային օրերով, ժամերով, գործունեության վայրով։ Պատգամավորը կարող է իր ֆունցկիաները կատարել ընտրողների հետ հանդիպումներով, տարբեր քննարկումների մասնակցելով, մարզեր այցելություններ կատարելով։ Ըստ էության, այս ամենը ընդդիմադիր պատգամավորները կատարում են։ Երբ ես գնում եմ տարբեր հավաքների, ակցիաների, այնտեղ տեսնում եմ ընդդիմության գրեթե բոլոր պատգամավորներին։ Այսինքն՝ նրանք այսպես, թե այնպես մասնակից են քաղաքական կյանքի իրադարձություններին՝ կատարելով իրենց պատգամավորական պարտականությունները»։
Ղազարյանի խոսքով՝ ներկայում Հայաստանի խորհրդարանում գոյություն ունի քաղաքական ճգնաժամ ու այն դադարել է իր ֆունկցիաները կատարել. «Խորհրդարանը կառավարման մարմին է, որտեղ պետք է տեղի ունենան հանրային հարցերի քննարկումներ, իսկ մեր հանրությանը հուզող հարցեր խորհրդարանում չեն քննարկվում, իսկ եթե քննարկվուն են, ապա միայն մեկ ուժի մասնակցությամբ, իսկ որոշումներն էլ ընդունվում են միաձայնության սկզբունքով։ Բացի դրանից մեր խորհրդարանում ստեղծվել է նաև իրավական ճգնաժամ՝ պայմանավորաված Վահե Հակոբյանի ու Իշխան Սաղաթելյանի պաշտոնազրկումներով ու ընդդիմադիրների՝ հանձնաժողովների՝ իրենց պաշտոներից հրաժարումով։ Այդ պահից սկսած ԱԺ-ն դադարել է լեգիտիմ մարմին լինելուց, քանի որ ԱԺ ղեկավար մարմիններում ընդդիմադիրներ լինելու պահանջը՝ ամրագրված է ԱԺ կանոնակարգ սահմանադրական օրենքում։ Եթե այդ պահանջը խախտվել է, ապա խախտվել է նաև ԱԺ կանոնակարգ սահմանադրական օրենքը, եթե խախտվել է կանոնակարգ օրենքը, ապա այլևս խախտվել է նաև ԱԺ լեգիտիմությունը»։
Մեր զրուցակցի համոզմամբ՝ եթե ՍԴ-ն մանդատներից զրկման որոշում կայացնի, ապա ընտրական ցուցակներում ընդգրկված այլ ընդդիմադիրները կարող են հրաժարվել իրենց մանդատներից ու դրանք չվերցնել. «Եթե ընդդիմադիրներին զրկեն պատգամավորական մանդատներից և ցուցակում հերթական տեղերը զբաղեցնողները ևս հրաժարվեն վերցնել դրանք, ապա մեր երկրում այլևս կստեղծվի սահմանադրական ճգնաժամ։ Խորհրդարանում մանդատների բաշխումը մեկ անգամ է լինում՝ ընտրություններից անմիջապես հետո ու, եթե երկու խմբակցություններն էլ խորհրդարանում ընդհանրապեա ներկայացուցիչներ չունենան, ապա հնարավոր չէ, որ ընտրություններին մասնակցած ու առավել շատ ձայներ ստացած մյուս կուսակցությունները գան խորհրդարան։ Դա բացառվում է։ Այստեղ էլ այլ հարց է առաջանում։ Եթե խորհրդարանում ընդդիմադիր պատգամավորներ չլինեն, դա էլ խախտում է Ընտրական օրենսգիրք սահմանադրական օրենքը, քանի որ դրանում ասվում է, որ խորհրդարանում առնվազն 30 տոկոսը կամ 1/3-ը պետք է ընդդիմության ներկայացուցիչներ լինեն»։
Առավել մանրամասն՝ սկզբնաղբյուրում: