2100 թ․-ին մոտ 2 մլրդ մարդ կլինի կյանքի համար վտանգավոր կլիմայական պայմաններում

Քանի որ աշխարհում եղանակը գնալով ավելի է տաքանում, տարեցտարի ավելի շատ մարդիկ են ենթարկվում վտանգավոր բարձր ջերմաստիճանների ազդեցությանը։ Nature Sustainability ամսագրում հրապարակված վերջին արդյունքները ցույց են տալիս, որ քաղաքականությունը չփոխելու դեպքում աշխարհն այնքան կտաքանա, որ ավելի քան 2 մլրդ մարդ կապրի կյանքի համար վտանգավոր տաք կլիմայում, տեղեկացնում է news.am-ը։

Science Hub-ի տվյալներով, ներկայումս միջին ջերմաստիճանն աշխարհում մինչարդյունաբերական մակարդակից մարդու գործունեության պատճառով բարձրացել է մոտ 1,2 աստիճանով ըստ Ցելսիուսի (մոտ 2 աստիճանով ըստ Ֆարենհեյթի)։ Փարիզյան համաձայնագիրը առաջարկում է սահմանափակել բարձրացումը 2,7 աստիճանով ըստ Ֆարենհեյթի։

Սակայն նոր ուսումնասիրությունը ցույց է տվել, որ ներկայիս օրենքների, բնակչության աճի և շրջակա միջավայրի պայմանների դեպքում ջերմաստիճանն աշխարհում, հավանաբար, մինչարդյունաբերական մակարդակից բարձր կլինի 4,8 աստիճանով, ըստ Ֆարենհեյթի։

Այնուհետև հետազոտողներն ուսումնասիրել են, թե որ շրջաններն ամենից շատ կտուժեն, եթե ջերմաստիճանը հասնի այդ մակարդակին։ Նրանք «աննախադեպ տապի» գոտիներ են սահմանել, որտեղ միջին ջերմաստիճանը ամբողջ տարվա ընթացքում, ներառյալ բոլոր սեզոնները, կազմում է 84,2 աստիճան ըստ Ֆարենհեյթի կամ ավելի բարձր։

Science Hub-ը տեղեկացրել է, որ 40 տարի առաջ աշխարհում միայն 12 մլն մարդ է ապրել այս ջերմաստիճանից բարձր տարածաշրջաններում։ Այսօր տաքացման պատճառով, որին արդեն ականատես ենք եղել, տուժել է մոտ 60 մլն մարդ։

Ուսումնասիրությունը ցույց է տվել, որ 2100 թվականին մոտ կանխատեսվող աշխարհի բնակչության 9,5 մլրդ-ից 2 մլրդ-ը կապրեն ըստ Ֆարենհեյթի 84,2 աստիճանից բարձր միջին ջերմաստիճան ունեցող շրջաններում։ Ինչպես նշում է Science Hub-ը, առավել տուժած շրջանները կլինեն հասարակածի շուրջ եղած երկրները՝ Հնդկաստանը, Նիգերիան, Ինդոնեզիան, Ֆիլիպինները և Պակիստանը։