Ադրբեջանի կողմից եկող ճնշումն ու տարածքային նոր նկրտումները գնալով ավելի են ուժեղանալու․ Տաթևիկ Հայրապետյան

ԱԺ նախկին պատգամավոր Տաթևիկ Հայրապետյանը ֆեյսբուքյան իր էջում գրում է. «Ադրբեջանի նախագահը հերթական «խաղաղասիրական» ելույթն է ունեցել, որտեղ հնչեցվել են հետևյալ հիմնական թեզերը` Ադրբեջանը հաղթող պետություն է, Հայաստանը` պարտված։ Բոլորը պետք է հաշվի առնեն այս իրողությունը։ Հայ-ադրբեջանական շփումների հիմքում հենց այդ գործոնն է ընկած։

Լեռնային Ղարաբաղի հակամարտությունը լուծված է։ Մինսկի խումբը ավարտել է իր գործունեությունը։

Հայաստանը պետք է համակերպվի, որ չկա Լեռնային Ղարաբաղ և չկա կարգավիճակի հարց, կա ղարաբաղյան շրջան, Բրյուսելում դա արձանագրվեց։

Ադրբեջանցիները դարերով ապրել են Զանգեզուրի արևելքում և արևմուտքում։ Այս տարածքներն անարդարացիորեն կտրվել են Ադրբեջանից և հանձնվել Հայաստանին։

Երևանը ևս կտրվել է և հանձնվել հայերին։ Դա անթույլատրելի հանցանք էր։

Մենք շարունակելու ենք հզորացնել մեր ռազմական ներուժը, քանի որ աշխարհում հարցերը լուծվում են ուժով։

Հ.Գ. Հստակ էր և կանխատեսելի, որ Ալիևը այսպես է պատասխանելու հայկական կողմի հետքայլերի քաղաքականությանը և Արցախի հարցում նշաձողի իջեցմանն ուղղված վտանգավոր գործելաոճին։

Ադրբեջանի կողմից եկող ճնշումն ու տարածքային նոր նկրտումները գնալով ավելի են ուժեղանալու։ Ուստի ինքնախաբեությամբ զբաղվելով և կեղծ «խաղաղություն» կառուցելով՝ մենք հերթական անգամ անպատրաստ ենք լինելու դիմակայել մեր մարտահրավերներին»։