Երևանի կենտրոնում բազմաֆունկցիոնալ բիզնես համալիր կկառուցվի. Ի՞նչ է այն ներառելու. Ներդրումը կկազմի 10 մլն դոլար

Կառավարությունն իր այսօրվա՝ մայիսի 13-ի նիստում հավանություն տվեց Սուրեն և Հասմիկ Փահլևանյանների՝ Երևանում բազմաֆունկցիոնալ բիզնես համալիր կառուցելու ներդրումային ծրագրին եւ համայնքին սեփականության իրավունքով պատկանող հողամասն ուղղակի վաճառքի ձևով օտարել նրանց:

Որոշման հիմնավորման մեջ նշվում է. «Քաղաքացիներ Սուրեն և Հասմիկ Փահլեվանյանները ներկայացրել են ք. Երևան, Կենտրոն վարչական շրջանի Ձորագյուղ ազգագրական թաղամասի 1-ին փողոց 21/3, 21/4, 21/5 հասցեներում գտնվող տարածքում իրականացնել ծրագրային առաջարկը: Ծրագրի ներդրումային ծավալը կազմում է շուրջ 10 մլն ԱՄՆ դոլար, աշխատանքները կտևեն 2-3 տարի, որի արդյունքում կստեղծվի 150-200 նոր աշխատատեղ։

Ծրագրի շրջանակներում, Ներդրողները կառուցելու են միջազգային չափանիշներին համապատասխան և ռելիեֆային անկումով հողատարածքի համար նախատեսված ճարտարապետական բացառիկ լուծումներով բազմաֆունկցիոնալ բիզնես համալիր։

Համալիրը իր մեջ ներառելու է ինչպես բնակելի և բիզնես տարածքներ այնպես էլ հատուկ մշակութային միջոցառումների համար նախատեսված սրահ (արդեն իսկ պայմանավորվածություն է ձեռք բերվել Սերգեյ Փարաջանովի տուն-թանգարանի հետ որոշակի նմուշների ցուցադրության մասով), երեք հարկից բաղկացած ավտոկայանատեղի և ճարտարապետական նորագույն լուծումներով այգի: Ծրագիրը ներառելու է նաև հարակից տարածքների բարեկարգում և ընդհանուր առմամբ կարող է լավ սկիզբ հանդիսանալ Հրազդանի կիրճի ճարտարապետական միջավայրի ձևավորման և հետագա զարգացման համար։

Համալիրն իր մեջ ներառելու է թանգարանային հատված, բնակելի հատված, գրասենյակային հատված, սրճարան, կլինիկա, մանկապարտեզ, բարեկարգված արտաքին միջավայր, 3 հարկ ստորգետնյա ավտոկայանատեղի։