21-րդ դարում պահպանողական լինելը վնաս է, առաջադեմ եղեք և գնացեք պատվաստվեք. Վահան Քերոբյան
Կորոնավիրուսի այս թվերը առաջացնում են մեծ մտավախություն, որ եթե հասարակության և բիզնեսի վարքագծում տեղի չունենա փոփոխություն, հավանական է, որ մեր առողջապահական համակարգը չկարողանա դիմանալ քովիդով հիվանդների ճնշմանը, և ստիպված լինենք որոշակի սահմանափակումների գնալ։ Այս մասին կառավարության նիստում ասաց Էկոնոմիկայի նախարար Վահան Քերոբյանը։
Վերջինս կոչ արեց մի կողմ դնել պահպանողական մոտեցումները և լինել առաջադեմ ու գնալ պատվաստվել։
«21-րդ դարում պահպանողական լինելը վնաս է տալիս, պետք է գնալ պատվաստվել։
Պատվաստված մարդկանց քանակով մենք աշխարհում ամենավատ տեղերում ենք և տարբեր ռեյտինգներում հայտնվում ենք կարմիր զոնաներում, ինչը նշանակում է, որ տնտեսական ակտիվությունը կարող է թուլանալ»,- ասաց Վահան Քերոբյանը։