Շուրջ 7 ժամ տևած քննարկումից հետո ԱԺ-ն այդպես էլ չավարտեց ընդդիմադիր փոխնախագահի ընտրության հարցը

8-րդ գումարման Ազգային ժողովի առաջին նստաշրջանի երրորդ նիստը մեկնարկեց խորհրդարանի նախագահի տեղակալի պաշտոնում Հակոբ Արշակյանի ընտրությամբ: Ընդդիմադիր «Հայաստան» և «Պատիվ ունեմ» խմբակցությունները չմասնակցեցին փակ և գաղտնի քվեարկությանը:

Նարեկ Բաբայան, ՀՀ ԱԺ հաշվիչ հանձնախմբի նախագահ - Ձայները բաշխվել են հետևյալ կերպ. Հակոբ Արշակյան. կողմ՝ 71, դեմ՝ 0:

Մինչև ընտրությունը, Հակոբ Արշակյանը ներկայացրեց իշխող քաղաքական ուժի առաջնահերթություններն ու նպատակները, խոսեց նաև բացթողումների մասին:

Հակոբ Արշակյան, ՀՀ ԱԺ նախագահի տեղակալ - Ուրախ կլինեի, որ Հայաստանում ռազմարդյունաբերությունը, տեխնոլոգիաները, պաշտպանական ոլորտը ֆինանսավորվեին ավելի վաղ: Ես դա չեմ ասում մեղադրելու համար, ասում եմ արձանագրելու համար պատճառահետևանքային կապը, որից մենք բոլորս պետք է դասեր քաղենք: Երբ խոսում ենք բանակում կոռուպցիայի մասին, մենք դա չենք անում բոլոր մեղքերն ուրիշների վրա բարդելու համար, բացի մեզանից, մենք դա ասում ենք, որպեսզի այլևս ոչ ոք չփորձի նման կերպ վարվել: Երբ ասում ենք դադարեցրեք հակամարտությունը և եկեք կառուցողական լինենք, մենք դա չենք ասում, որովհետև վախենում ենք հակամարտությունից: Ասում ենք, որովհետև դա բխում է մեր պետության և ժողովրդի շահերից և դրա կարիքը դուք նույնպես ունեք, սիրելի գործընկերներ, որովհետև մեզնից որևէ մեկը հավերժ չէ՝ ո՛չ իշխանության, ո՛չ էլ, առավել ևս, այս կյանքում, բայց մեր պետությունն այս գիտակցությամբ պետք է զարգանա, հանուն մեր սերունդների և հանուն երկարաժամկետ զարգացման:

Խորհրդարանի նիստը շարունակվեց հաջորդ փոխնախագահի ընտրության հարցի քննարկմամբ: Ըստ կանոնակարգ օրենքի՝ Ազգային ժողովի նախագահի տեղակալներից մեկի թեկնածուն կարող է առաջադրվել միայն ընդդիմադիր խմբակցության կազմում ընդգրկված պատգամավորների կազմից: «Հայաստան» խմբակցությունը ներկայացրեց Իշխան Սաղաթելյանի թեկնածությունը:

Սեյրան Օհանյան, ՀՀ ԱԺ «Հայաստան» խմբակցության ղեկավար - Մեր պայքարը շարունակվում է, Հայաստանի մարտահրավերները գնալով թանձրանում են, և մեր թիմը, գիտակցելով պահի ողջ լրջությունն ու պատասխանատվությունը, համոզված է, որ Իշխան Սաղաթելյանը Հայաստանի Հանրապետության Ազգային ժողովի փոխնախագահի պաշտոնում շարունակելու է ծառայել Հայաստանի պետականության և հայ ժողովրդի շահերին, իրացնել մեր «Հայաստան» դաշինքի քաղաքական նպատակադրումները:

Պատգամավորներն օգտվեցին Պաշտպանության նախկին նախարար Սեյրան Օհանյանի՝ ամբիոնի մոտ լինելու հանգամանքից. հարցեր ուղղեցին նաև Ապրիլյան, 44-օրյա պատերազմների ու անվտանգության ոլորտի վերաբերյալ: Օհանյանն էլ նշեց՝ կարծում է՝ 44-օրյա պատերազմի հանգամանքներն ուսումնասիրող Ազգային ժողովի քննիչ հանձնաժողովը պետք է ղեկավարի ընդդիմությունը: Հարցերից հետո երկրի թիվ մեկ քաղաքական ամբիոնին մոտեցավ Իշխան Սաղաթելյանը.

Իշխան Սաղաթելյան, ՀՀ ԱԺ նախագահի տեղակալ - Լիարժեք իրացնելով փոխնախագահին տրված լիազորությունները՝ հակազդելու եմ այն բոլոր վտանգներին ու սպառնալիքներին, որոնք կանգնած են մեր պետականության առջև: Վստահ եղեք՝ Ազգային ժողովի փոխնախագահի իմ այդ կարգավիճակը չի փոխելու ո՛չ մեր առաջնահերթությունները, ո՛չ մեր ընդհանուր պայքարի թիրախները, և ո՛չ էլ օրակարգերը: Ես շարունակելու եմ իմ պայքարն այս դահլիճում, կապ չունի նստած կլինեմ նախագահությունում, թե ներքևը, ես շարունակելու եմ իմ պայքարը Բաղրամյան պողոտայում, Ազատության հրապարակում և բոլոր այն հարթակներում, որտեղ դրա կարիքը կա:

ԱԺ նախագահի տեղակալի ընտրության հարցի քննարկումը երկար տևեց: Ելույթի համար հերթագրվեց 20 պատգամավոր: Շուրջ 7 ժամ տևած քննարկումից հետո խորհրդարանականներն այդպես էլ չավարտեցին հարցի քննարկումը: «Պատիվ ունեմ» դաշինքը հայտարարեց, որ կողմ կքվեարկի Իշխան Սաղաթելյանի թեկնածությանը: Մյուս խմբակցությունները ելույթ կունենան վաղը՝ քվեարկությունից առաջ: