ԱԺ փոխնախագահի պաշտոնը հերթական լրացուցիչ գործիք է ընդդիմության համար, իսկ այս իշխանության հետ ապագա չկա, թեև ասվում էր կարգախոսում՝ հակառակը. Իշխան Սաղաթելյանը ԱԺ-ում (Տեսանյութեր)

Եթե խորհրդարանի փոխնախագահի պաշտոնին ընտրվեմ, ընդդիմության առաջնահերթությունները և նրա պայքարի վերջնանպատակները չեն փոխվի։ Այս մասին ՀՀ նորընտիր Ազգային ժողովի հատուկ նիստում խորհրդարանի երեք փոխնախագահներից մեկի թեկնածության քննարկման ընթացքում օգոստոսի 4-ին հայտարարեց թափուր պաշտոնի թեկնածու, ՀՅԴ Գերագույն մարմնի ներկայացուցիչ Իշխան Սաղաթելյանը։

Նրա հավաստիացմամբ՝ ԱԺ փոխնախագահի պաշտոնը, որն ընդդիմությանն է վերագրված Սահմանադրությամբ, ծառայելու է գործընկերների, ինչպես նաեւ հազարավոր համախոհների եւ քաղաքացիների պահանջներին, որոնք վերջին ամիսներին օրենքի շրջանակում հասարակական-քաղաքական պայքար են մղել։

Նա նշեց, որ իշխանությունը, որը պարտվեց պատերազմում եւ 2020թ. նոյեմբերի 9-ին ստորագրեց տխրահռչակ հայտարարությունը կապիտուլյացիայի մասին, պետք է հրաժարական տա։ «Խորհրդարանի փոխնախագահ ընտրվելու դեպքում ես կդառնամ ընդդիմության ձայնը ինչպես խորհրդարաի ղեկավարությունում, այնպես էլ ընդհանրապես Ազգային ժողովում։ Լիովին իրականացնելով խորհրդարանի փոխնախագահին վստահված լիազորությունները՝ ես կընդդիմանամ այն բոլոր վտանգներին եւ սպառնալիքներին, որոնց բախվում է մեր երկիրը։ Վստահ եղեք, որ ԱԺ փոխնախագահի կարգավիճակը չի փոխի ոչ մեր առաջնահերթությունները, ոչ ընդհանուր պայքարի նպատակները, ոչ առկա օրակարգը»,- ընդգծեց Սաղաթելյանը։

Սաղաթելյանը ԱԺ փոխնախագահի պաշտոնը դիտարկում է որպես հերթական լրացուցիչ գործիք ընդդիմության համար, որի օգնությամբ կարելի կլինի առաջադրել քաղաքական պլատֆորմ այն ծրագրերի իրականացման համար, որոնք կծառայեն ինչպես ազգային, այնպես էլ պետական շահերին։ Թե ինչպես դա կարվի խորհրդարանում կառավարող կուսակցության 2/3 տեղերի պայմաններում, խորհրդարան անցած ընդդիմադիր ուժերը չեն պարզաբանում։

Այս իշխանության հետ երկիրն ապագա չունի: Այս մասին հայտարարեց փոխխոսնակի թեկնածու, ՀՅԴ ԳՄ ներկայացուցիչ Իշխան Սաղաթելյանը՝ մեկնաբանելով «Քաղաքացիական պայմանագրի» նախընտրական կարգախոսը, որում, մասնավորապես, ասվում է. «Կա ապագա, ապագա կա»:

Նրա խոսքով՝ ընդդիմությունը չի կարող համերաշխ լինել իշխանության հետ, որի գործունեության արդյունքում պետության տարածքային ամբողջականությունը սպառնալիքի տակ է:

«Հունիսի 20-ին կայացած խորհրդարանական ընտրությունները չհանգեցրեցին ներքաղաքական ճգնաժամի լուծմանը, որը սկսեց նոր դրսեւորումներ ստանալ՝ սպառնալով պետականությանը: Սպառնալիքի տակ է երկրի տարածքային ամբողջականությունը, խորանում է սոցիալ-տնտեսական ճգնաժամը»,-նշեց Սաղաթելյանը:

Ես ազատվել եմ զինվորական ծառայությունից պատմական գիտությունների թեկնածուի աստիճան ստանալու պատճառով: Այս մասին նորընտիր Ազգային ժողովի հատուկ նիստին երեք փոխնախագահներից մեկի թեկնածության քննարկման ժամանակ, պատասխանելով պատգամավորների հարցերին, հայտարարեց Իշխան Սաղաթելյանը:

Թեկնածուն միաժամանակ նշեց, որ 2016 թվականի ապրիլի 3-ից մինչեւ ապրիլյան էսկալացիայի ավարտն ինքն առաջնագծում էր: «Ղարաբաղում 44-օրյա պատերազմի ընթացքում ես զբաղվում էի մատակարարման հարցերով` ապահովելով ՀՅԴ-ի կողմից կազմավորված ստորաբաժանումը»,-հավելեց Սաղաթելյանը:

Պատասխանելով հարցին, թե ինչպիսին կլինի իր արձագանքը խորհրդարանի փոխնախագահի պաշտոնում չընտրվելու դեպքում, նա պատասխանեց, որ «միայն ուրախ կլիներ»: «Ինձ պաշտոնի համար պաշտոն պետք չէ: Պարզապես, ըստ Սահմանադրության, խորհրդարանի փոխխոսնակներից մեկը պետք է ներկայացնի ընդդիմությունը»,-հիշեց թեկնածուն

Այո, իմ ընտանիքը հյուրանոց ունի Սևանա լճի ափին: Այս մասին նորընտիր Ազգային ժողովի հատուկ նիստին երեք փոխխոսնակներից մեկի թեկնածության քննարկման ժամանակ հայտարարեց թափուր պաշտոնի թեկնածու, ՀՅԴ Գերագույն մարմնի ներկայացուցիչ Իշխան Սաղաթելյանը` պատասխանելով իշխող կուսակցության պատգամավորների հարցերին:

Թեկնածուի խոսքով` ինքը հյուրանոց է կառուցել բաց դաշտում, որտեղ ոչ մի կոմունիկացիա չկար: Խորհրդարանականը վստահեցրեց, որ ինքը չի օգտվել իր պաշտոնեական դիրքից` որեւէ արտոնություն ստանալու համար: Նշենք, որ Սաղաթելյանը Հայաստանի Գեղարքունիքի մարզպետի պաշտոնը զբաղեցրել է ընդամենը 4 ամիս:

«Ես իմ առաջին ընկերությունը բացել եմ 2005 թվականին: Այո, իմ ընտանիքը զբաղվել է եւ շարունակելու է զբաղվել բիզնեսով»,- ասաց Սաղաթելյանը` նշելով, որ ինքն քաղաքականության մեջ է մտել` դրանից բխող բոլոր սահմանափակումներով: