Եթե Արմեն Դանիելյանն ինքնաբացարկի միջնորդությունը մերժի, ապա կսպառենք ներպետական ատյանները, որ կարողանանք հարցը Եվրոպական դատարանում բարձրացնել․ նիստերին չենք մասնակցի․ Մանվել Փարամազյանի պաշտպաններ

Մենք հասկացանք, որ մամուլով շրջանառվող այն լուրերը, որ ԱԱԾ քննչական դեպարտամենտի կողմից առգրավել են համակարգիչը, որի միջոցով պետք է իրականացվեր դատական գործերի մակագրումը, իրական է։ Այս մասին լրագրողների հետ ճեպազրույցում ասաց Քաջարանի համայնքապետ Մանվել Փարամազյանի պաշտպաններից Լուսինե Սահակյանը։

Հիշեցնենք՝ տեղեկություններ էին տարածվում, թե ԱԱԾ-ն առգրավել է այն համակարգիչը, որով դատական գործերը մակագրվում էին դատավորներին։ Այդուհետ Փարամազյանին առնչվող գործը Վերքաննիչ քրեական դատարանի նախագահ Տիգրան Սահակյանի կողմից մակագրվել է դատավոր Արմեն Դանիելյանին։

«Սա օրենքով սահմանված կարգով չէ, որովհետև օրենքը նախատեսում է միայն մեկ դեպք՝ անհաղթահարելի ուժը, որի պայմաններում նախագահն իրավունք ունի իրականացնել մակագրություն։ Սա, բնականաբար, չի կարող համարվել անհաղթահարելի ուժ, որովհետև այդ համակարգը շատ արագ հնարավոր էր վերականգնել և մակագրությունն իրականացնել օրենքով սահմանված կարգով»,-ասաց Լուսինե Սահակյանը՝ ընդգծելով, որ Արմեն Դանիելյանին ինքնաբացարկի միջնորդություն են ներկայացրել։

Ըստ Սահակյանի՝ որևէ պատճառաբանություն չի ներկայացվել, թե ինչ իրավունքով է նախագահը մակագրել Դանիելյանին։ «Լրջագույն խնդիր է, երբ գործադիր մարմինը ուղիղ ազդեցություն է գործադրում դատական իշխանության նկատմամբ։ Համակարգիչն առգրավել է ԱԱԾ քննչական դեպարտամենտը․ դա այն դեպարտամենտն է, որի միջնորդությամբ Մանվել Փարամազյանը կալանավորված է, և որը քննում է Փարամազյանի վերաբերյալ գործը»,-ասաց Սահակյանը։

Նրա խոսքով՝ ոչնչով չի բացատրվում համակարգչի առգրավումը, վարույթում ընդհանրապես չի երևում, չնայած, ըստ Սահակյանի, պետք է երևար։

«Դատավորն իրավունք ուներ այս դատական նիստը բացել միայն այն բանից հետո, երբ ինքը կպարզեր, որ օրենքով սահմանված կարգով է այս մակագրությունն իրականացվել։ Արմեն Դանիելյանն այն դատավորն է, որ տարիներ շարունակ ճանաչվում է վատագույն դատավոր և իշխանության ցանկացած պատվեր իրականացնում է»,-նշեց նա, ապա հավելեց․

«Մենք խնդրել ենք, որ Դանիելյանը ինքնաբացարկ հայտնի, եթե իր մեջ ուժ ունի այդպիսի որոշում կայացնելու։ Մանվել Փարամազյանն էլ ներկայացրել է իր դիրքորոշումը, որ ցանկանում էր բողոքի քննարկմանը մասնակցել և դատարանի առջև իր խոսքն ասել, բայց, երբ պարզել է, որ դատավորը լինելու է Արմեն Դանիելյանը, և այս դատական նիստում բարձրացված հարցերն այլևս ձևական բնույթ են կրում, չի ցանկանում այս դատական նիստին մասնակցել։ Մենք ևս նշել ենք, որ չենք մասնակցի դատական նիստին, եթե դատարանը որոշի չբավարարել ինքնաբացարկի միջնորդությունը»։

Սահակյանը մի հանգամանք ևս կարևորեց․ «Եթե կա անհաղթահարելի ուժ, նախագահն իրավունք չունի մակագրել այն դատավորին, որին ցանկանում է․ կա այբբենական կարգ, այդ դեպքում կարող էր մակագրվել, օրինակ, դատավոր Ազարյանին, կամ մյուս դատավորներին, որոնք այբբենական կարգով նախորդում են Դանիելյանին»։

Փարամազյանի պաշտպաններից Երվանդ Վարոսյանն էլ նշեց․ «Բնականաբար, Դանիելյանը մեր բողոքը մերժելու է, շարունակելու ենք սպառել ներպետական ատյանները, որ կարողանանք հարցը Եվրոպական դատարանում բարձրացնել։ Մենք սովոր ենք, որ ՀՀ ներպետական ատյանները քաղաքական տիպի գործերով միշտ եղել են ուղղակի սպառելու վայր, որ կարողանաս Եվրոպական դատարան բողոք ներկայացնել։ Երբ Տիգրան Սահակյանը բողոքը մակագրել է Արմեն Դանիելյանին, մեզ համար ամեն ինչ պարզ է։ Նրանից դատական պաշտպանություն ակնկալելն անիմաստ է»։

Նրանք նաև հայտնեցին, որ ինքնաբացարկի վերաբերյալ որոշումը հայտնի կդառնա այսօր։