Ուկրաինայում իշխող կուսակցության խմբակցության ղեկավարը խորհուրդ է տվել Արսեն Ավակովին ընտրել Խարկովի քաղաքապետ
Ուկրաինայի ՆԳ նախարարի պաշտոնից հրաժարականի դիմում ներկայացրած Արսեն Ավակովը կարող է դառնալ Խարկովի լավ քաղաքապետ, նա վերջակետ կդնի այն հարցին, թե այս քաղաքը ռուսական է, թե ուկրաինական: Այս մասին հայտարարել է Ուկրաինայում իշխող «Ժողովրդի ծառա» կուսակցության խորհրդարանական խմբակցության ղեկավար, Ուկրաինայի Բարձրագույն ռադայի պատգամավոր Ալեքսանդր Կորնիենկոն, գրում է «ՌԻԱ Նովոստի» գործակալությունը:
«Ես Խարկովի համար ավելի լավ տարբերակ չեմ տեսնում, քան Արսեն Բորիսովիչը: Դա կլինի վերջակետ Խարկովի` ռուսական քաղաք լինելու հարցում: Դա կլինի վերջակետը. Խարկովը ուկրաինական քաղաք է», - լրագրողների հետ զրույցում ասել է Կորնիենկոն:
Ավակովը երեքշաբթի հրաժարականի դիմում է ներկայացրել, ըստ օրենքի՝ պաշտոնանկությունը պետք է հաստատի Ուկրաինայի Գերագույն ռադան: Հինգշաբթի Ռադան քվեարկել է նրա հրաժարականի օգտին: Ավակովը չի նշել իր հրաժարականի պատճառները և չի խոսել հետագա ծրագրերի մասին:
Խարկովի քաղաքապետի ընտրություններում հաղթած Գենադի Կեռնեսը մահացել է 2020-ի դեկտեմբերին Գերմանիայում, կորոնավիրուսային վարակի հետևանքներից: Քաղաքապետի մահից հետո Խարկովի քաղաքային խորհուրդը վաղաժամկետ դադարեցրել է նրա լիազորությունները: Ռադան հոկտեմբերի 31-ին նշանակել է Խարկովի քաղաքապետի արտահերթ ընտրություններ: Ավակովը զբաղեցրել է Խարկովի մարզային պետական վարչակազմի ղեկավարի պաշտոնը 2005-ից 2010 թվականներին, Իսկ Ուկրաինայի ՆԳ նախարարի պաշտոնը զբաղեցնում էր 2014 թվականից: