Ինձ ինչո՞ւ հաշվի չեք առնում, ես էլ եմ եղել բիզնեսմեն, բայց վերջին 7 ամսում օրական միջինը 15 ժամ աշխատել եմ․ Վահան Քերոբյանը՝ Խաչատուր Սուքիասյանի, Գուրգեն Արսենյանի՝ ՔՊ ցուցակում լինելու մասին

Ոչ թե 7 տոկոս, այլ`9 տոկոս տնտեսական աճ։ Կառավարության ծրագիրը կազմել ենք այդ տրամաբանությամբ, նույնիսկ մի քիչ էլ ավել, որ գոնե 9 տոկոսն իրագործենք։ Այս մասին Կառավարությունում լրագրողների հետ ճեպազրույցում ասաց էկոնոմիկայի նախարար Վահան Քերոբյանը՝ անդրադառնալով դիտարկմանը, թե իշխանությունը խոստացել է ամեն տարի առնվազն 7 տոկոս տնտեսական աճ ապահովել և հարցին՝ ինչ հիմքեր կան նման լավատեսության համար, ինչպես է ապահովվելու՝ հաշվի առնելով այն բոլոր խնդիրները, որոնք առկա են։

«ՀՀ-ի առջև կանգնած մարտահրավերներն այնպիսին են, որ դա այն նվազագույն տնտեսական աճն է, որի պարագայում մենք կկարողանանք մեր բոլոր անվտանգային, հումանիտար բոլոր հարցերը լուծել։ Ունենք մանրամասն ծրագիր, թե ինչպես ենք անելու»,-ասաց նախարարը։

Լրագրողի դիտարկմանը, թե ներդրումներ ինչպես են ապահովելու, երբ գործարարները խոսում են արտագաղթի մասին, Քերոբյանն արձագանքեց․ «Գործարար շրջապատում իմ շրջապատն ավելի մեծ է, քան ձերը․ տնտեսվարողների, բիզնեսմենների 90 տոկոսը ինձ խոստովանում է, որ եթե հանկարծ իշխանափոխություն տեղի ունենա, ապա կարտագաղթեն։ Մենք պետք է ամեն ինչ անենք, որ ՀՀ-ում եղած ամբողջ ներուժը համախմբենք։ Ես կոչ եմ անում բոլոր գործարարներին լծվել երկրի շենացման գործին, և ես էլ իրենց տրամադրության տակ եմ, որ իրենց մոտ եղած բոլոր խնդիրները լուծվեն»,-ասաց նա՝ համաձայնելով նաև, թե արտագացթ կա։

«Արտագաղթ կա․ չեմ ժխտում, որ կա միտում, իհարկե, մարդկանց մի մասը հիասթափված է 44-օրյա պատերազմի արդյունքից, միգուցե նաև կառավարության աշխատանքից, և մենք պետք է այնպիսի միջավայր ստեղծենք, որ հիասթափությունը գնալու պատճառ չդառնա»,-ասաց նա։

Դիտարկմանը, որ տարիներ շարունակ խնդրահարույց է եղել խորհրդարանում խոշոր սեփականատերերի, բիզնեսմենների ներկայությունը, մինչդեռ ՔՊ ցուցակում այժմ երկու ներկայացուցիչ կա՝ Խաչատուր Սուքիասյան, Գուրգեն Արսենյան, Քերոբյանն արձագանքեց՝ իրեն ինչու՞ հաշվի չեն առնում․ «Ես էլ եմ եղել բիզնեսմեն, բայց վերջին 7 ամսվա ընթացքում օրական միջինը 15 ժամ աշխատել եմ և դա արել եմ միայն իմ ժողովրդի համար»,-ասաց նա։

Նախարարը նշեց, թե Խաչատուր Սուքիասյանին չի ճանաչում, ճանաչում է Գուրգեն Արսենյանին․ «Արսենյանը բացառիկ հայրենասեր մարդկանցից է, որոնց ես ճանաչում եմ, նրա հետ իմ արժեքային համակարգն ամբողջությամբ սինխրոն է, և ես վստահ եմ, որ իր մասնակցությունը պետական կառավարմանը միայն օգուտ է տալու հայ ժողովրդին, և վստահ եմ 100 տոկոսով, որ ոչ մի օգուտ չի տալու իր բիզնեսին, որովհետև ինքն ինքնաբավ մարդ է և որևիցե լրացուցիչ փող աշխատելու կարիք բացարձակապես չունի, փողը երբեք առաջին նպատակ չի կարող լինել խոհեմ մարդկանց համար»,-ասաց էկոնոմիկայի նախարարը։