Գյումրիում « Քաղաքացիական պայմանագրի» հավաքած բարձր տոկոսով ձայները քաղաքականապես անգրագիտության հետևանք են. Գագիկ Համբարյան. Armdaily
ArmDaily.am-ի հետ զրույցում քաղաքագետ Գագիկ Համբարյանն ասաց, որ Գյումրիում «Քաղաքացիական պայմանագրի» հավաքած բարձր տոկոսով ձայները քաղաքականապես անգրագիտության հետևանք են։
«Քաղաքականապես անգրագիտությունը, թերուսությունը և շատ հմտորեն մանիպուլյացիայի ենթարկելը՝ նիկոլականների կողմից այդ մասսային։ Գիտեք, այնքան հեշտ է թերուս, անգրագետ մասսային համոզել, որ ամեն ինչում նախկիններն են մեղավոր։ Ասենք, ընդամենը մեկ հարց կարելի է տալ և այդ մեկ հարցով եզրափակել։ Դուք հիշում եք, որ մինչև իշխանության գալը ազգադավ Նիկոլը հայտարարում էր, որ աղետի գոտում կա 4000-ից ավել անօթևաններ։
Դա վերաբերում էր և Շիրակի մարզին, հատկապես Գյումրի քաղաքին, որտեղ տնակային ավաններ կան և Լոռու մարզին։ Բայց իշխանության գալուց հետո պարզվեց, որ ոչ։ Ըստ նիկոլական պաշտոնական տվյալների կա մոտավորապես 500 անօթևան։ Եվ ամենահետաքրքիրը գիտեք որն է՝ նախկինում անօթևանները և նրանց թիկունքում կանգնած ՀԿ-երը, որոնք ամեն քայլափոխին կանգնած բարձրաձայնում էին, որ Գյումրիում հազարավոր անօթևաններ կան, տնակներ կան՝ ծպտուն չեն հանում այս երեք տարվա մեջ։ Մեկը չկա, որ ասի, լավ, իսկ այդ հազարավոր անօթևանները ո՞ւր գնացին։ Այն դեպքում, երբ որ Գյումրիում մեկ տարվա մեջ մեկ բնակարան չի կառուցվել»,-ասաց Համբարյանը։
Քաղաքագետը նշում է, որ շատ հետաքրքիր է, շատ հետաքրքիր ֆենոմեն է, որ ոչ ոք չի բարձրաձայնում, որ սարսափելի վատացել է տնակային ավաններում ապրող մարդկանց վիճակը, որովհետև վերջին մեկ տարվա ընթացքում առաջին անհրաժեշտության ապրանքների գները սարսափելի բարձրացել են՝ կարագը, ձեթը, շաքարավազը, մակարոնեղենը, որը հիմնականում օգտագործվում է անօթևանների կողմից որպես սնունդ։
«Բայց ինչպես տեսնում ենք, մարդիկ շատ երջանիկ են և ուրախ։ Դե ինչ ասեմ, թող շարունակեն նույն տեմպերով։ Ավելին ասեմ, նրանց երջանկացնեմ, իհարկե այս ընտրություններից հետո գնաճը ավելի է շատանալու, որովհետև այս ընտրությունների համար մեծ գումարներ ծախսած օլիգարխները, որոնք սերտ կապեր ունեն այս իշխանության հետ, մեխանիկորեն, ինչպես նախկինում էին ծառայում իրենց տերերին, այնպես էլ հիմա ծառայելով Նիկոլ Փաշինյանին՝ իրենց ծախսածները պետք է հանեն ժողովրդից։
Եվ կտեսնեք, ընդամենը շատ կարճ ժամանակ անց ինչպես է տեղի ունենալու կրկին առաջին անհրաժեշտության ապրանքների գնաճ»,-ասաց քաղաքագետը։
Համբարյանը նշեց, որ պարզվեց գյումրեցիները շատ արագ մոռանում են, թե որ նախագահի օրոք Գյումրիում ինչ ծրագրեր են իրագործվել։
«Գյումրին գրեթե իր այս տեսքը ստացել է Ռոբերտ Քոչարյանի կառավարման տարիներին։ Ի շնորհիվ Ռոբերտ Քոչարյանի, ով երկու ծրագրի շնորհիվ ահռելի գումարներ բերեց Գյումրի, մեկը «Լինդսի» հիմնադրամ, մյուսը «Հազարամյակների մարտահրավերների» հիմնադրամն էր։
Ռոբերտ Քոչարյանի կառավարման տարիներին Գյումրիի գրեթե բոլոր կենտրոնական փողոցներն ի շնորհիվ ՔԸրք Քրքորյանի տրամադրած գումարների՝ վերակառուցվեցին և շատ դեպքերում նոր փողոցներ կառուցվեցին, որովհետև նախկիններն էլ գոհություն չունեին։ Բազմաթիվ շենքեր են կառուցվել, բազմաթիվ շենքեր ամրացվել են և վերաբնակեցվել են, մոտավորապես 4 տասնյակ դպրոցներ են տնակներից տեղափոխվել քարե շենքեր բայց այս իշխանությունների օրոք մի բնակարան չի կառուցվել։
Վերջին մեկ տարում պարտքերով, սուբվենցիոն ծրագրերով, որքան գիտեմ Համաշխարհային բանկից և Եվրոպական բանկից գումարները պարտքերով վերցրած կենտրոնական մասում մի քանի, շատ կարճ փողոցներ են վերանորոգվում, բայց դա երևում է հասարակության աչքին։ Այն դեպքում, երբ նախկինում ինչ-որ արվել է Գյումրիում՝ արվել է բարերարների և դոնոր կազմակերպությունների շնորհիվ , որպեսզի դա շատ ծանր չնստի պետական բյուջեին։
Երեք տարուց ավել է ՆԻկոլ Փաշինյանը վարչապետ է՝ մի բարերարի չի բերել Գյումրի, մի ծրագիր խոշոր չի իրականացվել մեր պետական բյուջեի, բարերարների կամ դոնոր կազմակերպությունների միջոցով։ Պարտքով արված ծրագրերը վաղը մյուս օրը գյումրեցու ջաներից է դուրս գալու, ինչպես ասում են Գյումրիում»,- շեշտեց Գագիկ Համբարյանը։
Քաղաքագետը նշեց, որ մի քանի ասֆալտապատ փողոցների միլիոնավոր պարտքերը գյումրեցիներն են մուծելու։
«2016 թվականին Գյումրիում սկսված ճանապարհաշինական ծրագիրը, որին, ի դեպ, Նիկոլ Փաշինյանն Ազգային Ժողովում այդ ծրագրի քվեարկության ժամանակ ծրագրին դեմ էր քվեարկել, առանց ամոթի, նույն ՆԻկոլ Փաշինյանը, մեկուկես տարի անց գալով իշխանության, մեծ հաճույքով այդ ծրագիրը սեփականաշնորհեց և գալիս էր Գյումրի՝ փողոցներում բացման արարողություն էր կազմակերպում, երբ որ ինքն այդ ծրագրի հետ կապ չուներ։
Այդ ծրագիրն իրականացվել էր նախկին վարչապետ Կարեն Կարապետյանի անմիջական ղեկավարությամբ։ Բայց, ինչպես տեսնում ենք, գյումրեցիների մեծ մասը կարճ հիշողություն ունի և ինչպես ես նկատեցի՝ քաղաքական մազոխիստներ են՝ թող շարունակեն նույն տեմպերով՝ տեսնենք ուր են հասնելու այսպես»,-եզրափակեց Համբարյանը։