на Русском
Փարիզում Moulin Rouge կաբարեի հողմաղացի անվաթ... 
Մենք պետք է գործենք հիմա՝ Ադրբեջանին պատասխան... 
«Եթե Արևմուտքն այդ կարծիքին է, դա դեռ չի նշանակում, որ այդպես է». Պուտինը մերժել է ՌԴ-ի քաղաքականության անկանխատեսելիության մասին պնդումը
Ռուսաստանի Դաշնության նախագահ Վլադիմիր Պուտինը հայտարարել է, որ եթե Արևմուտքը կարծում է, որ Ռուսաստանի Դաշնության վարած քաղաքականությունն անկանխատեսելի է, դա դեռ չի նշանակում, որ դա այդպես է, փոխանցում է «ՌԻԱ Նովոստի»-ն:
«Ի վերջո, եթե Արևմուտքն այդ կարծիքին է, դա բոլորովին չի նշանակում, որ այդպես է: Նախ պատասխանեմ Ձեր հարցի առաջին մասին: Դուք ասացիք, որ Արևմուտքը կարծում է, որ Ռուսաստանի արտաքին քաղաքականությունն անկանխատեսելի է: Թույլ տվեք Ձեզ «պատասխան տափօղակ» ուղարկել. 2002-ին ԱՄՆ-ի՝ հակահրթիռային պաշտպանության համակարգերի սահմանափակման մասին պայմանագրից դուրս գալը բացարձակապես անկանխատեսելի քայլ էր: Ինչո՞ւ է դա արվել՝ ռազմավարական անվտանգության ոլորտում խարխլելով միջազգային կայունության հիմքերը»,- շեշտել է Պուտինը՝ պատասխանելով Ժնևի գագաթնաժողովին հաջորդած մամուլի ասուլիսում այն հարցին, թե պատրաստ է արդյոք Ռուսաստանը հրաժարվել իր «անկանխատեսելի» քաղաքականությունից՝ Միացյալ Նահանգների հետ հարաբերությունները բարելավելու համար:
Բացի այդ, ՌԴ նախագահը հիշեցրել է 2019 թվականին ԱՄՆ-ի՝ «Միջին և փոքր հեռահարության հրթիռների ոչնչացման» պայմանագրից անսպասելի և ապակայունացնող դուրս գալը, ինչպես նաև «Բաց երկնքի մասին» պայմանագրից դուրս գալը:
«Գրեթե ոչինչ չի մնացել: Փառք Աստծո, նախագահ Բայդենը կայացրել է բացարձակ ադեկվատ որոշում՝ հինգ տարի երկարացնելով Ռազմավարական հարձակողական սպառազինությունների կրճատման պայմանագիրը»,- հավելել է Պուտինը:
Վլադիմիր Պուտինը շեշտել է, որ Ռուսաստանի Դաշնությունն արտաքին քաղաքականության շրջանակում ադեկվատ կերպով է արձագանքում առաջացող սպառնալիքներին, և՛ Ռուսաստանի Դաշնությունը, և՛ ԱՄՆ-ն պետք է համաձայնության գան միջազգային գործերում վարքականոնների վերաբերյալ:
«Կարծում եք՝ մեզ անկանխատեսելի՞ ենք պահում: Ո՛չ, ես այդպես չեմ կարծում: Իմ կարծիքով՝ մենք բացարձակապես ադեկվատ ենք արձագանքում առաջացող սպառնալիքներին, և ես կարծում եմ, որ իրավիճակի՝ իսկապես կայուն լինելու համար մենք պետք է համաձայնության գանք այդ բոլոր ոլորտներում վարվելակերպի կանոնների շուրջ»,- հստակեցրել է Պուտինն ու հավելել՝ այդ հարցերի թվում են ռազմավարական կայունությունը, կիբերանվտանգությունը, ինչպես նաև տարածաշրջանային հակամարտություններին վերաբերող հարցերի լուծումը:
«Կարծում եմ, որ այս ամենի շուրջ կարելի է համաձայնության գալ, ամեն դեպքում, ես այսօր նման տպավորություն եմ ստացել նախագահ Բայդենի հետ մեր հանդիպման արդյունքներից»,- ամփոփել է ՌԴ առաջնորդը:
