Սյունիքի անվտանգության հարցերով այսօր բացառապես ռուսներն են զբաղվում՝ չգովազդելով արդյունքները. Մենուա Հովսեփյան
Մեր սահմաններում կարելի է ասել ամեն օր որևէ խնդիր է լինեմ, մեծ կամ փոքր, որոնց մասին հաճախ չենք էլ բարձրաձայնում, քանի որ հիմնականում ռուս գործընկերների հետ կարողանում ենք արագ լուծումներ տալ: Այս մասին Tert.am-ի հետ զրույցում ասաց Գորիսի փոխհամայնքապետ Մենուա Հովսեփյանը՝ խոսելով Սյունիքում սահմանային իրավիճակի մասին:
Մենուա Հովսեփյանը անդրադարձավ նաև է Տեղ համայնքում հունիսի 12-ին տեղի ունեցած միջադեպին, երբ տեղացիները գյուղատնտեսական աշխատանքներ կատարելիս ապակողմնորոշվել են և տրակտորներով և երեք «Նիվա» մակնիշի ավտոմեքենաներով հայտնվել են ադրբեջանական ԶՈՒ-ի վերահսկողության տակ գտնվող տարածքում, հավաքվել էին նաև բնակավայրի բնակիչները և ստեղծվել էր լարված իրավիճակ։
«Մենք տեղյակ պահեցինք ռուսական կողմին և արագ արձագանքեցին, ռուսները դեպքի վայր են ժամանել և մի քանի ժամվա ընթացքում հայկական կողմին վերադարձրել մեքենաները: Հիշո՞ւմ եք՝ հուլիսի 8-ին էլ հայկական ԶՈՒ զինվորական, Ակներ գյուղի բնակիչ Արթուր Քարթանյանը, մառախուղի պատճառով ապակողմնորոշվել և հայտնվել է ադրբեջանական ԶՈՒ-ի կողմից վերահսկվող տարածքում, որտեղից էլ նրան գերեվարել և ձերբակալել, կրկին կապ ենք հաստատել և Ռուստամ Մուրադովի աջակցությամբ ընդամենը մի քանի ժամվա ընթացքում խնդիրը լուծվեց»,– ասաց նա:
Անդրադառնալով հարցին որևէ նախապայմաններ առաջ քաշվում են ադրբեջանական կողմից, փոխհամայնքապետն ասաց, որ նշված դեպքերի լուծման համար նմանօրինակ որևէ դեպք չի եղել, որ խնդիրները լուծվեն նախապայմաններ առաջ քաշելու արդյունքում:
«Սա ամենակարևորն է, որ ոչ մի նախապայման առաջ չի քաշվում, ռուս գործընկերները կարողանում են առանց նախապայմանների հարցերը լուծել: Այդպես էր նաև, Կոռնիձորի ներքևի հատվածում, երբ պետական սահմանին, թշնամին մոտ տասը տեխնիկա վարորդների հետ միասին շրջափակել էր և ուզում էր գերի վերցնել, սակայն կրկին ռուսների միջամտությամբ, մեր քաղաքացիներին կարողացանք իրենց ընտանիքներին վերադարձնել։ Վստահաբար կարող եմ փաստել, որ Սյունիքի անվտանգության հարցերով այսօր բացառապես ռուսներն են զբաղվում, բայց այնպիսի կեղծ տպավորություն է ստեղծվում, որ ոչինչ չեն անում ռուսները, հետևաբար հարց է առաջանում․ եթե մեր ամենօրյա խնդիրները ռուսները չեն լուծում, բա ո՞վ է լուծում, հանցավոր անգործության մատնված իշխանությո՞ւնը, որ բացարձակ իրավիճակին ո՛չ տիրապետում է, ո՛չ էլ իրենց հետաքրքրիր է, բոլոր խնդիրներին ինչպես են լուծումներ տրվում։ Փաստ է, որ Սյունիքում ամեն օր ստեղծված խնդիրների լուծման գործում ռուսների դերակատարումը շատ մեծ է, և շնորհակալ ենք, Ռուստամ Մուրադովն, Գորիսում տեղակայված խաղաղապահ զորքերի ներկայացուցիչ գնդապետ Գորինին, որ համագործակցության արդյունքում խնդիրները լուծում են մեր օգտին։ և, վերջապես, ռուսներն ուղղակի լավ են իրականացնում իրենց վերապահված խաղաղապահի առաքելությունը, առանձնապես չգովազդելով արդյունքները»,– եզրափակեց նա: