Փաշինյանն արժանի է գնդակահարության, բայց մենք ջունգլիներում չենք ապրում, մեր երկրում անարխիա չի լինելու, լինելու է արդարադատություն․ Իշխան Սաղաթելյան
Մեր երկրում պտտվում է մի ուրվական՝ ամոթի, խայտառակության և պարտության ուրվական, հունիսի 20-ին մենք պետք է փակենք այդ ամոթի և խայտառակության էջը և հայ ժողովրդի համար բացենք նոր, հզոր Հայաստանի էջ։ Այս մասին այսօր Գորիսում քարոզարշավի ժամանակ ասաց ՀՅԴ ԳՄ անդամ, «Հայաստան» դաշինքի ցուցակի երկրորդ համար Իշխան Սաղաթելյանը։
«Սիրելի հայրենակիցներ այս օրերին այս Քաջ Նազարը, որ հայտնվել է Հայաստանի Հանրապետության իշխանության ղեկին, պտտվում է գյուղերով, քաղաքներով և անընդհատ մի միտք է արտահայտում, որ եթե ժողովուրդը ցանկանա ինձ գնդակահարել՝ ասում է, որ ինքը պատրաստ է։ Իհարկե, ինքն արժանի է դրան, բայց կրկին չի հասկանում, որ մենք ջունգլիներում չենք ապրում և մեր երկրում անարխիա չի լինելու։ Մեր երկրում լինելու է արդարադատություն»,––ասաց նա և նշեց, որ այսօրվա իշխանությունը պետք է պատասխան տա իր արածների համար, որ մեր երկրում այլևս դավաճանություն չլինի։
Իշխան Սաղաթելյանը ներկայացրեց իրենց ծրագրերը տարբեր ոլորտներում՝ շեշտելով, որ վերականգնելու են Գյուղատնտեսության նախարարությունը։ Նա նաև նշեց, որ իրենց ուղղված «վայրահաչոցներին» չեն արձագանքելու և խոսելու են Հայաստանից և Հայաստանի ապագայից։