Հայաստանում ավելի քան 1500 ուսուցիչներ 2021թ․ նոյեմբերից կարող են սկսել հավելյալ պարգևավճարներ ստանալ

Այս տարի Հայաստանում կներդրվի 7-12-րդ դասարանների ուսուցիչների կամավոր ատեստավորման համակարգ այնպիսի առարկաներից, ինչպիսիք են «Հայոց լեզուն», «Հայ գրականությունը», «Հայաստանի պատմությունը», «Հանրահաշիվը», «Երկրաչափությունը», «Ֆիզիկան», «Քիմիան», «Կենսաբանությունը», «Աշխարհագրությունը»: Այս մասին մայիսի 10-ին լրագրողների հետ հանդիպման ժամանակ ասաց Հայաստանի կրթության, գիտության, մշակույթի եւ սպորտի փոխնախարար Ժաննա Անդրեասյանը:

Նա բացատրեց, որ մայիսի 3-ից մայիսի 30-ը ուսուցիչները կարող են դիմումներ, ինչպես նաեւ դպրոցից տեղեկանք եւ դիպլոմի պատճեն ներկայացնել:

«Դիմումը կարելի է ներկայացնել նաեւ էլեկտրոնային եղանակով: Կամավոր ատեստավորման արդյունքում ակնկալվում է, որ ավելի քան 90% արդյունավետությամբ ուսուցիչները կհամարվեն արտոնագրված եւ կսկսեն իրենց աշխատավարձի 50%-ի չափով պարգեւավճար ստանալ: 80%-ից բարձր արդյունավետությամբ ուսուցիչների համար պարգեւավճարները կկազմեն աշխատավարձի 30%-ը: Այն ուսուցիչները, որոնց արդյունավետությունը 70-80% կլինի, կհամարվեն արտոնագրված, բայց նրանք հավելավճարներ չեն ստանա: Ավելի համեստ արդյունք ցուցաբերած ուսուցիչները մեկ տարի անց կվերաատեստավորվեն: Եթե այս դեպքում նրանց արդյունքները անբավարար լինեն, ապա կարող է նրանց գործունեությունը շարունակելու հարց դրվել»,- ասաց Անդրեասյանը:

Նրա խոսքով՝ քննությունների ժամանակացույցը կկազմվի մինչեւ օգոստոսի 20-ը, քննությունները կանցկացվեն սեպտեմբերին, իսկ նոյեմբերից ուսուցիչներն արդեն կսկսեն ստանալ պարգեւավճարները:

Պաշտոնյայի կանխատեսումներով՝ ընդհանուր առմամբ, մոտ 2000 դիմում կստացվի, եւ ավելի քան 1500 ուսուցիչներ, ամենայն հավանականությամբ, կկարողանան հաջողությամբ հանձնել քննությունները եւ հավելավճարներ ստանալ:

«Առայժմ ամեն օր մոտ մեկ տասնյակ դիմում ենք ստանում, սակայն մինչ դիմումների ներկայացման ավարտը այս թիվը կավելանա, ինչպես սովորաբար լինում է նման դեպքերում: «Գնահատման եւ թեստավորման կենտրոն» ՊՈԱԿ-ը կհրապարակի եւ գրականության ցուցակը, եւ ուղեցույցներ, որոնք կօգնեն հասկանալ, թե ինչ հարցեր կարող են լինել քննություններին։

Փոխարինող ուսուցիչները նույնպես կարող են դիմել եւ ստանալ պարգեւավճարներ այն ժամանակահատվածի համար, որում փոխարինել են: Համատեղությամբ աշխատող ուսուցիչները եւս կարող են շահառու դառնալ, եթե, օրինակ, նրանք դասավանդում են նաեւ բուհում կամ դասավանդում են մի քանի առարկա (այս դեպքում դիմումը պետք է ներկայացվի մեկ առարկայից): «Հայոց լեզու» եւ «Գրականություն» առարկաներից դիմորդների համար կկազմակերպվի հայոց լեզվի քննություն: Ծրագիրը հաջորդ տարի կարող է ընդլայնվել»,- ընդգծեց փոխնախարարը:

Ինչ վերաբերում է պարտադիր ատեստավորմանը, Անդրեասյանը հիշեցրեց, որ այն անցկացվում է 5 տարին մեկ:

«Առաջիկա պարտադիր ատեստավորումը կլինի նրանց համար, ովքեր պետք է այն անցնեին 2019-ին՝ հաշվի առնելով, որ վերջին երկու տարիներին այն չի իրականացվել: Սա արդեն ենթադրում է ոչ թե գիտելիքների ստուգում, այլ միայն փաստաթղթերի ներկայացում: Բացի այդ, նախատեսվում է կազմակերպել որակավորման բարձրացման դասընթացներ եւ ներդնել 9-աստիճան վարկանշային համակարգ»,- եզրափակեց պաշտոնյան: