Հրվ․ Աֆրիկայում հուղարկավորել են զուլուների թագուհուն. ըստ վարկածներից մեկի` նրան թունավորել են
Հարավային Աֆրիկայի զուլու ժողովրդի համանուն արքայական ընտանիքի միապետի հուղարկավորությունն անցել է մասնավոր արարողության ընթացքում՝ երկրի Կվազուլու Նատալ նահանգում, հայտնում է BBC լրատվականը և հավելում, որ նրա մահը շատ անսպասելի էր։
Թագուհուն հուղարկավորել են մայրաքաղաք Յոհանեսբուրգից 480 կիլոմետր հեռավորության վրա գտնվող «Կվախանգալեմանքենգանե» թագավորական պալատում։ Թագուհու աճյունը փաթաթվել է կովի կաշվի մեջ։
Ինչպես ավելի վաղ տեղեկացրել էր Tert.am-ը, արքայական ընտանիքը հայտնել է միապետի մահվան մասին, որը գահը ստանձնել էր մեկ ամիս առաջ։ 65-ամյա թագուհի Շիյիուա Մանթֆոմբի Դլամինի Զուլուն գահը ստանձնել էր մեկ ամիս առաջ` դառնալով երկրի ամենամեծ էթնիկ խմբի ժամանակավոր ղեկավարը:
Թագուհու մահվան պատճառը դեռևս հայտնի չէ, սակայն կա վարկած, ըստ որի`նրան թունավորել են, ինչը, սակայն, հերքվել է արքայական ընտանիքի կողմից։ Հայտնի չէ, թե թագուհու մահից հետո, ով է ստանձնելու գահը և ղեկավարելու 11 միլիոնանոց ժողովրդին։
Հիշեցնենք՝ ըստ Յոհանեսբուգում BBC-ի թղթակից Նոմսա Մասեկոյի` գահաժառանգի հարցը կարող է պառակտում առաջացնել արքայական ընտանիքում, որը, հակառակ քաղաքական ուժ չունենալուն, հասարակության մեջ հիմնական դեր է խաղում և տարեկան 4,9 միլիարդ դոլար ստանում պետական հարկերից:
Գահի հիմնական հավակնորդը հանգուցյալ թագավորի և թագուհու ավագ որդին՝ արքայազն Միսիզուլուն է։ Թագավորը, որը մահացել է 72 տարեկանում անցյալ ամիս, ունեցել է 6 կին և 26 երեխա, սակայն թագուհին իր կանանց մեջ միակն է եղել, որն ազնվական ծագում է ունեցել։
Թագուհի Շիյիուա Մանթֆոմբի Դլամինի Զուլուն հանգուցյալ թագավոր Զուեթիլինի կինն էր և Էսվատինի թագավորի Մսուաթի 3-րդի քույրը, որն ամենաբարձր կարգավիճակն ուներ արքայական տան կանանց շարքում, քանի որ սերում էր արքայական ընտանիքից: Հանգուցյալ թագուհին և թագավորը 8 երեխա են ունեցել, որոնցից 5-ը՝ տղա: Այժմ գահի հիմնական հավակնորդը նրանց ավագ որդին է, որը 47 տարեկան է: