Արթուր Վանեցյանը շատ առանցքային դեր է ունենալու ԱԺ արտահերթ ընտրություններում. Սոս Հակոբյան (տեսանյութ)

Այս պահին հստակ է միայն մեկ որոշում՝ գնալու ենք դաշինքով, իսկ ցուցակի, դաշինքի անվան, ծրագրային դրույթների մասով նորություններն օր առաջ կհրապարակենք, երբ լինի հրամանագիր ընտրություններ նշանակելու մասին, քննարկումները աշխատանքային խմբերում գնում են, ղեկավարների միջև են համաձայնեցվում և պատրաստ լինելուն պես, երբ փաստ դառնան արտահերթ ընտրությունները, մենք առաջինն ենք շահագրգռված, որ լայն հանրությանը դրանք մատչելի դառնան: Այս մասին լրագրողների հետ զրույցում ասաց «Հայրենիք» կուսակցության մամուլի խոսնակ Սոս Հակոբյանը՝ անդրադառնալով արտահերթ ընտրություններին «Հայրենիք» և «Հայաստանի Հանրապետական կուսակցության» դաշինքով մասնակցելուն։

«Ամենաքննարկվող հարցերից մեկն է դաշինքի կազմումը, եթե խոսում ենք Վանեցյանի մասին պետք է նշենք՝ նա 20 տարի շարունակ կանգնած է օրինականության հաստատման առաջնագծում և դա իրեն նկարագրող անբաժանելի բնութագրիչն է և ԱԱԾ տնօրեն եղած ժամանակ էլ մշտապես եղել է օրինականության հաստատման սիմվոլը Հայաստանում: Արթուր Վանեցյանը մինչև պաշտոնավարումը, պաշտոնավարման ժամանակ, ասել է երկու հստակ թեզ, որոնք պետք է ամբողջությամբ դիտել՝ սևերի և սպիտակների բաժանումը կեղծ օրակարգ է, նախկինին վերադարձ չի լինելու»,- ասաց Սոս Հակոբյանը:

Նա նաև տեղեկացրեց՝ երեկ հանդիպում է ունեցել «Հայրենիք» կուսակցության նախագահի հետ և ասուլիսի ընթացքում մանրամասնեց, թե ինչ է հայտնել նրան Արթուր Վանեցյանը:

«Ցանկացած հանցագործություն կատարած անձ պետք է կրի պատասխանատվություն, և ես երեկ հանդիպում եմ ունեցել կուսակցության նախագահի հետ և նա ևս մեկ անգամ շեշտադրել է՝ մեր իշխանության գալու պարագայում անգամ ամենամտերիմ անձը, որը կունենա խնդիր օրենքի հետ, կրելու է օրենքով սահմանված խիստ պատասխանատվություն: Երբ մենք ունենանք իշխանական ազդեցություն, թե՛ բարոյական պահանջներն են շատ ավելի լինելու, թե՛ իրավական պահանջներն են խստորեն պահպանվելու»,- նշեց նա:

Սոս Հակոբյանը նաև նշեց՝ երկու կուսակցությունների ղեկավարներն ունենալու են առանցքային դեր արտահերթ ընտրություններում, նաև մանրամասնեց, թե ինչ ներկայացուցիչներ են լինելու դաշինքում:

«Այնպիսի մարդիկ, որոնք կարող են օրենքի հետ համերաշխություն չունենալ, բնականորեն ցուցակում չեն կարող լինել, բայց ցուցակում լինելու են երկու սկզբունքի վրա հիմնված՝ մարդիկ, որոնք ունեն հանրության շրջանում վստահություն, որոնք կարող են լինել օգտակար ՀՀ-ին իրենց կարողությունների շրջանակներում: Ես ձեզ վստահեցնում եմ՝ Արթուր Վանեցյանը, լինելով «Հայրենիք» կուսակցության նախագահ, շատ առանցքային դեր է ունենալու ընտրություններում և ամբողջ քաղաքական գործընթացում, ինչպես նաև մեզ հետ դաշինքի գնացող ղեկավարը»,- նշեց խոսնակը:

Դաշինքի կազմման թեմայով Սոս Հակոբյանը հավելեց՝ կուսակցություններն իրենց ռեսուրսներով բացառիկ են դաշտում և հենց դա էլ հանդիսացել է խթան դաշինքով հանդես գալու համար:

««Հայրենիք» և «ՀՀԿ» կուսակցության տեխնոկարտ-քաղաքական թիմի ամենապահեստային նստարանը զրոյական հաշվի վրա կթողնի Փաշինյանի թիմին, անգամ եթե խաղա առանց դարպասապահի, այսինքն՝ մենք ունենք շատ հարուստ և երկու կողմից էլ փոխլրացնող ուղեղային թիմ, մասնագիտական, անցած ճանապարհի, պետական ծառայությունում հավաքած փորձի առումով, որը, ես կարծում եմ, դաշտում այդ առումով բացառիկ է լինելու»,- ընդգծեց խոսնակը:

Լրագրողների հարցին՝ արդյո՞ք իրատեսական են արտահերթ ընտրությունները, Սոս Հակոբյանը պատասխանեց՝ մինչև 2 անգամ չարձանագրվի այն փաստը, որ վարչապետին չեն ընտրում Ազգային ժողովում, մենք շարունակելու ենք կասկածի տակ դնել արտահերթ ընտրությունների անցկացումը, իսկ եթե իրականացվեն ընտրությունները, ապա ներկայացուցիչ ուժերը պետք է ողջ ռեսուրսները ներդնեն արդար և թափանցիկ իրականացման համար:

«Ընտրությունների արդար կամ թափանցիկ անցնելը կախված է մեր ջանքերից և բնական է, որ ոչ մեկս չի վստահելու, որ Փաշինյանը գուցե մնա հավատարիմ իր խոստումներից մեկին, քանի որ չի մնացել ոչ մեկին, և մենք կկենտրոնացնենք մեր բոլոր ուժերը ընտրությունները վերահսկելու համար»,- նշեց Սոս Հակոբյանը:

Մանրամասները՝ տեսանյութում։

«Հայրենիքի» և ՀՀԿ-ի տեխնոկրատ թիմի անգամ պահեստային նստարանը զրոյական հաշվի վրա կթողի Փաշինյանի թիմին. Սոս Հակոբյան