Ալիևը խոսում է Մեղրիի միջանցքի մասին, Զանգեզուրը վերցնելու մասին. սրանք գոնե պատասխանեն Ալիևին, այդ մուռը հանում են սյունեցիներից. Ի. Սաղաթելյան (տեսանյութ)

Սյունեցիները մտահոգություն արտահայտելու իրավունք ունեն, որովհետև Փաշինյանի նախորդ այցերից հետո քաղաքացիներն իրենց մաշկի վրա զգացել են հետևանքները: Այս մասին լրագրողների հետ զրույցում ասաց ՀՅԴ ԳՄ անդամ Իշխան Սաղաթելյանը՝անդրադառնալով Փաշինյանի՝ Սյունիքի մարզ կատարած այցելությանը և դիտարկմանն առ այն, որ Քաջարանի համայնքապետն ասել էր՝ վարչապետի այցից հետո իրենց մտավախություններն ավելացել են:

Սաղաթելյանի խոսքով՝ այս իշխանության գործունեության հետևանքները սյունեցիները տեսնում են ամեն օր: «Ամեն սյունեցի այսօր այդ վտանգը տեսնում է իր աչքով, իրենք ունեն այդ բարոյական իրավունքը, որ վարչապետի աթոռը զբաղեցրած անձին վռնդեն Սյունիքից: Այդ գնահատման հարցում իրենք միանշանակ ճիշտ են, որովհետև սա չարիք է, Սյունիքում, առավել ևս՝ Հայաստանում նա անելիք չունի: Այդ ֆոնին Ալիևն անում է հայտարարություններ, կրկին խոսում է Մեղրիի միջանցքի մասին, խոսում է Զանգեզուրը վերցնելու մասին: Սրանք գոնե պատասխանեն Ալիևին, Ադրբեջանի իշխանությանը, այդ մուռը հանում են սյունեցիներից »,- ասաց Սաղաթելյան:

Նրա խոսքով՝ սյունեցիների նկատմամբ ՔԿ-ի և ԱԱԾ-ի գործողությունները պարզապես խայտառակություն են:

«Մեր ժողովուրդը սրան համապատասխան վերաբերմունք պիտի ցույց տա»,- ասաց Սաղաթելյանը:

Նրա խոսքով՝ եթե այսօր Սյունիքի կարևոր առանցքային դեմքերին, համայնքի ղեկավարներին, ակտիվիստներին և այն մարդկանց, ովքեր պատերազմի օրերին ապացուցեցին, որ իրենց կյանքը կարող են դնել, մարդկանց մեկուսացնում են, ձերբակալում են, կալանավորում են, ապա իրենք ունեն իրավունք ասելու, որ սրանից հետո կարող են Մեղրու միջանցք զիջել կամ ընդհանրապես Սյունիքը զիջել:

Մանրամասները՝ տեսանյութում