Պետք է պարզել ինչու ընդհատվեց գերեվարված շիրակցիների վերադարձի գործընթացը եւ ոչ թե ծնողներին ասել՝ դիմեք ՌԴ-ի դեսպանին. Արցախի նախագահի ներկայացուցիչ. «Փաստինֆո»
Եթե գերեվարված 62 շիրակցիներից ութին Ադրբեջանը վերադարձրել է, ուրեմն հնարավոր է, որ 54-ին էլ վերադարձնի, պետք է պարզել, թե ինչու գործընթացը ընդհատվեց․ «Փաստինֆո»-ի հետ զրույցում նման դիտարկում է հայտնել Արցախի նախագահի հատուկ ներկայացուցիչ Բորիս Ավագյանը՝ վստահություն հայտնելով, որ անկախ Ադրբեջանի հայտարարություններից, թե բոլոր ռազմագերիներին վերադարձրել են, հնարավոր է մտածված քայլերի միջոցով պահվող մյուս անձանց ևս հայրենիք վերադարձնել։
Բորիս Ավագյանը չհստակեցրեց, թե ռազմական գործողությունների ավարտից հետո՝ Հադրութի Հին Թաղեր ու Խծաբերդ բնակավայրերում, դեկտեմբերի 16-ին գերեվարված 62 շիրակցիներից 54-ին վերադարձնելու ուղղությամբ ինչ քայլեր են կատարվում, սակայն նշեց, որ հիմնական խնդիրն է քննարկել և բացահայտել հասարակությանը, թե ինչի՞ պատճառով է գործընթացը կանգ առել։ Դա է հիմնական հարցը, որ հասարակությունը պետք է ուշադրություն դարձնի և հարցն ուղղի կառավարությանը։
ԱՀ նախագահի ներկայացուցիչը, մասնավորապես, անակնկալ որակեց իմքայլական պատգամավոր Արթուր Մանուկյանի հայտարարությունը, թե գերիների հետ կապված հարցերը պետք է ուղղել ՌԴ դեսպանին։ «Այն հայտարարությունները, որոնք այսօր արվում են, օրինակ՝ պատգամավոր Մանուկյան Արթուրն ասում է, որ պետք է դիմել ՌԴ դեսպանին՝ գերիների հարցով։ Ինձ համար անակնկալ է, զարմանում եմ ո՞նց կարելի է նման հայտարարություններ անել։ Քաղաքացիները պետք է հավաքվեն, գնան ՌԴ դեսպանին դիմեն և հարցնեն՝ իրենց բարեկամները երբ են վերադառնալու Հայաստա՞ն»։
Նշենք, որ Իմքայլական պատգամավոր Արթուր Մանուկյանը «Հրապարակին» տված հարցազրույցում հայտարարել էր, թե «գերիների հարցն ինչքան մերն է, այնքան էլ ռուսներինն է և ռուսներն են գարանտ՝ այդ հարցը լուծելու»։ Ապա՝ նաեւ նշել էր, որ գերեվարվածների մասին հարցերը պետք է ուղղել ՌԴ դեսպանին, եւ ինքը պետք է փոխանցի Վլադիմիր Վլադիմիրովիչին։
Բացի պատգամավորների հայտարարություններից, արդյոք վարչապետի՝ Ադրբեջանին ուղղված հայտարարությունները կարո՞ղ են խանգարել գերիների վերադարձի գործընթացին, Ավագանը նշեց, որ չի հետևում Փաշինյանի բոլոր հայտարարություններին, սակայն անհրաժեշտ է համարում աշխատանքային խումբ կազմել, վերլուծել ընդհանուր խնդիրը։
«Կարելի է անընդհատ հարցազրույցներ տալ, պետական պաշտոնյաները, պատգամավորները կարող են ինչ-որ հարցերի շուրջ կարծիքներ հայտնել։ Ամեն մեկն իր սեփական կարծիքն է հայտնում, բաց պետք է կոնսոլիդացված աշխատանքային խումբ ստեղծվի՝ գերատեսչական և միջպետական՝ ՀՀ-ի և Արցախի ներկայացուցիչներով։ Երկու հանրապետությունների ներկայացուցիչների խումբը պետք է վերլուծի խնդիրը։ Ակունքները պետք է հասկանանք՝ ի՞նչն է կանգնեցրել այն գործընթացը, որը գնում էր։ Վերլուծության համար պետք է ունենալ ամբողջական ինֆորմացիա։ Եթե ամեն մեկը իր փոքր կտորով սկսի վերլուծել, պատասխանները կլինեն ոչ լիարժեք, կամ իրար հակասող»,- ասաց նա։
Արցախի նախագահի հատուկ ներկայացուցիչը նշեց, որ աշխատանքային խումը ստեղծելուց և խնդրի ակունքները հասկանալուց հետո հնարավոր կլինի ունենալ դրական դինամիկա։
Մանրամասները՝ սկզբնաղբյուրում։