Թբիլիսիում տուգանվել է ծննդյան կապակցությամբ Պոզներին և նրա հյուրերին ընթրիք մատուցած հյուրանոցը
Ռուս հայտնի հաղորդավար, լրագրող և գրող Վլադիմիր Պոզները չորեքշաբթի ժամանել էր Թբիլիսի ծննդյան 87-րդ տարեդարձը նշելու համար, գրում է newsgeorgia.ge-ն՝ հավելելով, որ լրագրողի այցն անսպասելի շրջադարձ է ստացել չորեքշաբթի երեկոյան հյուրանոցի մոտ սկսված բողոքի ակցիայից հետո։
Նշվում է, որ բողոքի ակցիայից զատ, Վրաստանում աշխատանքային տեսչությունը հայտարարել է, որ հյուրանոցը, Պոզներին և նրա հյուրերին ընթրիք մատուցելով, խախտել է Վրաստանում երեկոյան 9-ից գործող «պարետային ժամը» և հյուրանոցին տուգանել է 10 հազար լարիով:
Առայժմ պարզ չէ՝ Վրաստանում գործող սահմանափակումները խախտելու համար կտուգանվի՞ արդյոք Պոզները, թե՞ ոչ։
Նշվում է, որ ակցիայի անցկացման վայր ժամանած ոստիկանները հավաքվածներին հավաստիացրել են, որ «բացառություններ չեն լինելու և սահմանափակումները գործում են բոլորի համար»։
Ըստ վրացական ԶԼՄ-ների՝ Պոզները Թբիլիսի է ժամանել չարտերային չվերթով, նրա հետ ժամանել է 50 մարդ՝ լրագրողի ընկերներն ու գործընկերները: Միջոցառման կազմակերպիչը եղել է երգչուհի Միրանդա Միրիանաշվիլին՝ ռուս գործարար Լեոնիդ Օգարյովի կինը:
«Ես արդեն երրորդ տարին է, ինչ ծննդյանս օրը նշում եմ Թբիլիսիում։ Ես այստեղ եմ ոչ թե քաղաքականությունից խոսելու, այլ ծննդյանս օրը նշելու համար»,- ավելի վաղ օդանավակայանում իրեն դիմավորած լրագրողների հարցին պատասխանել էր Պոզները։
Ավելի ուշ հայտնի էր դարձել, որ Պոզները, որը նախատեսում էր Վրաստանում մնալ մինչև ապրիլի 3-ը, իր այցով պայմանավորված բողոքի ակցիաներից հետո լքել է Թբիլիսին։
«Ռուս լրագրող Պոզները և նրա հյուրերը լքել են Վրաստանը։ Ինքնաթիռը թռել է Թբիլիսիի միջազգային օդանավակայանից։ Օդանավակայանում մոբիլիզացվել են իրավապահ մարմինների աշխատակիցները։ Կային նաև ցուցարարներ»,- տեղեկացրել էր վրացական «Առաջին ալիք»-ը՝ հավելելով, որ հեռուստահաղորդավարն ու նրա ընկերները ոստիկանության ուղեկցությամբ դուրս են եկել հյուրանոցի շենքից, ցուցարարները նրանց ուղեկցել են օդանավակայան, այնուհետև, համոզվելով, որ ռուս այցելուները լքել են երկիրը, հեռացել են։