Կոպենհագեն, Լոնդոն, Սիեթլ. ամերիկուհին գրեթե 20 տարի կարողացել է հիմարացնել անվտանգության աշխատակիցներին և առանց տոմսի թռչել ինքնաթիռով
ԱՄՆ Չիկագոյի Օ'Հար միջազգային օդանավակայանում բերման է ենթարկվել 69-ամյա Մերիլին Հարթմանը, որը գրեթե 20 տարի առանց տոմսի թռչել է ինքնաթիռով: Նա կալանավորվել է լրատվամիջոցներից մեկի հետ հարցազրույցից երկու օր անց, որի ընթացքում Հարթմանը հայտարարել է, որ ավարտում է իր «անօրինական ճանապարհորդությունները», գրում է Insider-ը:
«Նա առաջին անգամ օդանավ է նստել 2002 թ.-ին և անվճար թռչել է Կոպենհագեն: Նա նաև կարողացել է ներթափանցել դեպի Սիեթլ, Ֆենիքս, Ֆիլադելֆիա, Ատլանտա, Սան Ֆրանցիսկո և Լոնդոն ուղևորվող ինքնաթիռներ: Վերջին 19 տարվա ընթացքում Մերիլին Հարթմանը կարողացել է անօրինական ճանապարհով նմանատիպ 30 թռիչքի մասնակցել»,- գրում է պարբերականը:
«Ես երբեք ինքս ինձնով ինքնաթիռ չեմ նստել, ինձ միշտ թույլ են տվել անցնել: Այսինքն, ես անցնում էի անվտանգության անցակետն առանց տոմսի: Ես ուղղակի հետևում էի ինչ-որ մեկին: Օրինակ, մի անգամ մի տղա կապույտ պայուսակ էր տանում, և ես օգտագործելով այդ պահը կարողացել էի ներթափանցել անվտանգության գոտի, որից հետո աշխատակիցներն ուղղակի ինձ ներս էին թողել՝ մտածելով, որ ես այդ կապույտ պայուսակով տղայի հետ եմ»,- պատմել է է Հարթմանը:
Կինն առաջին անգամ ձերբակալվել է 2014-ին, երբ Կալիֆոռնիայի Սան Խոսե քաղաքից Լոս Անջելես էր թռչում: Դատավորները նախազգուշացրել էին նրան հրաժարվել այդ անօրինական պրակտիկայից, բայց 7 ամիս անց Մերիլինը դարձյալ առանց տոմսի ինքնաթիռում էր հայտնվել:
Առաջին ձերբակալությունից հետո Մերիլինը մի քանի անգամ բերման է ենթարկվել: Օ'Հարայի օդանավակայանում նրան արդեն դեմքով են ճանաչում անվտանգության բոլոր աշխատակիցները: 2019 թվականից Հարթմանի պատճառով օդանավակայանում հատուկ էլեկտրոնային հսկողություն է տեղադրվել: Կինը ճանաչվել է անգործունակ՝ իր հոգեկան խանգարումների պատճառով: Ինքը՝ Մերիլինը, իր հանցագործությունն արդարացնում է նշելով, որ շատ ծանր մանկություն է ունեցել:
Իրավապահների խոսքով՝ կնոջը սպառնում է իրական բանտարկություն, քանի որ «նա սպառել է փորձաշրջանի նշանակման իր բոլոր հնարավորությունները»: